admin
Thokozile Mbedzi
ZILOKHU zikhuza umhlola izakhamizi zesigabeni seNyandeni eMatopo ngemva kokuba enye indoda igamule enye yafa ngeSonto.
Umetheswacala uMthabisi Tshuma oleminyaka engu-33 ovela eGwamba eNkayi kubikwa uhlahlele uLeon Mnkandla oleminyaka engu-27 ngehloka kubangwa ukuthi kungani uMnkandla eyale ukumtshela ukuthi wayebotshelweni.
Kuzwakale ukuthi uTshuma wangena endlini uMnkandla wasemlandela khonokho nje uTshuma wahle wamhlahlela ngehloka wawa wafela lapho.
Ekhuluma lentatheli kaMthunywa uBlessing Dube uthe lokhe bemangele ukuthi uTshuma wayengenwe yini.
“Abantu lokhe bemangele lapha esigabeni ukuthi uTshuma ubengenwe yini aze abulale omunye kubangwa nje ukuthi kungani engathandanga ukuchaza ukuba ubebotshelweni.
“Ngesikhathi ababili laba bekhulumisana bacina bengasezwanani uTshuma wangena endlini uMnkandla laye walandela kanti wayeselanda ukufa kwakhe,” kutsho uMnu Dube.
“UTshuma ubesebenza lapho abehlala khona kodwa ubesephendule lowomuzi waba yitshabhini. UMnkandla ubengomunye walabo akade benatha kulowo muzi.
“Okumangalisayo yikuthi kambe umuntu ubengaze abulale omunye kubangwa nje ukuthi akhulume imfihlo yakhe.
“Mina ngokubona kwami kukhanya wayecabanga ukuthi uMnkandla angabe kukhona akutshele amapholisa ngaye kungakho wayesedliwa ngumzwangedwa,” kulandisa uMnu Dube.
Omele isikhulumi samapholisa esabelweni seMatabeleland South uSergeant Thandolwenkosi Moyo ebuzwa ngodaba lolu uthe solufikile ehofisini labo ngakho amapholisa ayakhathazeka kakhulu ngokulahleka kwempilo.
“Njengemapholisa siyakhathazeka kakhulu ngokulahleka kwempilo ngenxa yengxabano ezibakhona ezingalungiseka nje ngomlomo ngoba vele koniwa ngolomo kuphinde kulungiswe ngawo. Abantu nxa besuke baba lokungezwani kababikele amapholisa loba abaphathi bezigaba ukuze singabi silahlekelwa yimpilo njengalokhu,” kuphetha uSgt Moyo.
Online Reporter