admin
YiNtatheli kaMthunywa
NGABE kuthakazelelwa iminyaka engu-35 yeCopa Coca-Cola!
Sekudlule amathuba amabili kusehlula ukuthi abantwana abasezikolo abalethalenta lenguqu bancintise kunkezo abayithanda kakhulu eye-Copa Coca-Cola.
Ngenxa yokuthi izikolo zivaliwe njalo inguqu ayidlalwa, amaqembu alumdlalo esikolo alinde ngabomvu mhla kuzabikwa ukuthi inkundla sezivuliwe.
Kodwa abadlali lababalisi abakalahli ithemba. Babika ukuba bayilindile ngabomvu inkezo le ukuthi iphenduke.
Inkezo yeCopa Coca-Cola yasungulwa ngomnyaka ka-1989 kuleli lapho eyaphakanyiswa yisikolo seMzilikazi High kudlala uPeter Ndlovu.
Kwaba ngeyinye imbali kuzikolo zakoBulawayo ngo-2019 isicoco sithwala ngamankazana esikolo seMpopoma High.
Lapho kwaba ngokokucina ukudlalwa kwe-Copa Coca-Coca andubana kuhlasele igcikwane le-Covid 19 .
Inkezo yokucina yancintiselwa enkundleni yeRimuka eKadoma.
Ukuqhutshwa komncintiswano lo kwaletha inguquko enkulu kubadlali lakuzikolo. Imidlalo le yatshintsha impilo zabadlali abasakhulayo ezikolo ikakhulu kumaqembu amantombazana asezibona elethuba lokuphila ngonobhutshuzwayo.
Kusukela kwasungulwa umdlalo wamantombazana ngaphansi kweCopa Coca-Cola ngo 2011, sekuvele ukuba abantwana abangamankazana sebekhwabitha ukugiqa ngoba benanzelela utshintsho oluhle olusempilweni zalabo abake baphatheka kulumdlalo.
Kungxoxo lephephandaba likazulu kumaviki amabili adluleyo, ababalisi kuzikolo ezikoBulawayo laseMatabeleland bathe loba belusizi ngesimo sezemidlalo, balesiqiniseko sokuthi iphupho labo lizafezeka kuminyaka ezayo.
“Ukukhuthwa ngumncintiswano onjenge-Copa Coca-Cola kuzwisa ubuhlungu. Nxa umntwana obekumele azitshengisele ithalenta lakhe lonyaka, sekuzamele alinde omunye omncintiswano,” kutsho uNkanyiso Dube umbalisi ongumqeqetshi esikolo se-Chinonge esiseBinga.
Isikolo lesi ngesinye esathola ukuphakanyiswa ngokuba ngesakuqala esivela emaphandleni eBinga ukuphatheka emncintiswaneni.
Abantwana abangamantombazana bazakhumbula behlangana labosaziwayo ababalisa uNomsa “Boyz” Moyo loSithethelelwe “Kwinji 15” Sibanda kumncintiswano lo.
Inkuthazo evele kuMoyo ngeyokuthi abasakhulayo, ikakhulu amankazana, kumele babekezele kunguqu loba isikhathi seCovid-19 sinzima kwezemidlalo.
“Ngikhuthaza abantwabethu abadlala inguqu ukuthi bazame ukuzibamba, bathole ithuba lokuthi bafunde ngomdlalo ukuze bathole inzuzo kuyo. Imincintiswano efana leCopa Coca-Cola inikeza umdlali inkundla yokuthi azitshengisele emphakathini.
Online Reporter