admin
Ethel Ncube
ZISANATHISANA itiye izakhamizi zeMakhala line eTsholotsho ngemva kokuba enye indoda ibulele indodakazi yayo ngemva kokuyitshayelela phansi ngekhanda ithi iyayiqondisa.
UMthokozisi Hadebe oleminyaka yokuzalwa engu-32 kubikwa utshayelele indodakazi yakhe eleminyaka eyisificaminwe mibili phansi ngekhanda ngeviki ephelileyo.
Kuzwakale ukuba umetheswala osadingwa ngamapholisa, waphenduka endlini ngehola lika-11 ebusuku evela zidlela amabele waqonda endlini lapho okwakulele khona abantwana bakhe wafika wabavusa wababuza ukuthi kungani engabatholanga ngekhaya emini.
Kubikwa uthe esebabuzile waphakamisa lo oleminyaka engu-8 wamtshayelela phansi ngobuso wahle waqaleka wafa.
Umetheswacala kubikwa wathi ebona ukuthi usebulele umntwana wahle wadliwa ngumnyama.
UMthunywa uxhumane lenduna yakule indawo uGampu oveze ukuba indaba yendoda eyabulala indodakazi yayo wayizwa.
“Ngamukela umbiko wokuba kulendoda ebulele umntanayo njalo ilokhu isadingwa kayikabonakali,” kutsho induna uGampu.
Isikhulumi samapholisa eMatabeleland North uInspector Glory Banda uchaze ukuba udaba lolu lwafika endlebeni zabo.
“Sidinga umetheswacala owabulala indodakazi yakhe eleminyaka eyisificaminwe mibili.
“Ngikhuthaza abazali ukuba kumele bananzelele ukuba abantwana balelungelo labo lokuphila njalo akumelanga bahlukuluzwe,” kuphetha uInsp Banda.
Online Reporter