Vusumuzi Dube
Ethel Ncube
KUSIGA esihlasimulisa umzimba, kulendoda yesiqintini seMahlikihliki, eNkayi ngaphansi kwenduna uTshugulu ebulele abantwabayo ababili ngokubahlahlela amakhanda, yasihudula izidumbu izama ukuyazitshisa andubana izibophele.
Insindabaphenduli le yenzakale ngeviki ephelileyo.
UZenzo Ncube oleminyaka engu-47 yokuzalwa kubikwa ubehlala labantwabakhe ababili laba ababuleleyo, kulandela ukwedlula kukanina emhlabeni.
UNcube kubikwa emini waqonda komkamnewabo, ongumakhelwane wafika wacela umentshisi esithi ufuna ukuyapheka kodwa wahle wawugcina.
Kubikwa ebusuku wavusa abantwabakhe abangabafana ababili; uMandlenkosi Ncube (8) loZimiso Ncube (5) wasedobha ihloka wahlahlela owokuqala ikhanda waze wafa andubana asukele omunye ngendlela efanayo.
Isikhulumi samapholisa elizweni uCommissioner Paul Nyathi uqinisekise ngesehlakalo lesi.
“Samukele umbiko wendoda yeMahlikihliki, eNkayi, uZenzo Ncube (47) egamule abantwabayo ababili amakhanda bafa. Indoda le ibiphila lomkhuhlane wengqondo,” kutsho uComm Nyathi.
Uthe uNcube esebulele abantwana, wahudula izidumbu waphuma egumeni wahamba isibanga esingaba ngamamitha ayisikhombisa.
“UNcube wahudula izidumbu zabantwabakhe wafika wazifaka phandle andubana afake izigodo phezu kwazo wazama ukuzitshisa kodwa umlilo wala ukubamba, wasefulathela.
“Esuka lapho waqonda enxiweni lukamnewabo wafika wavula endlini wazibophela wafa.”
Kubikwa esinye isihambi sathi sisedlula sabona indlu ivuliwe sasondela sathola uZenzo evele esethule, sazisa ezinye izakhamizi, ezasuka zayakhangela abantwana bathola beganyulwe njalo kufakwe izigodo phezulu njalo kukhanya ukuba kuke kwazanywa ukubaswa umlilo kodwa wala ukulumatha.
Izidumbu zathwalelwa esibhedlela ukuyahlolwa imbangela yokufa.
UCommissioner Nyathi uphethe ngokuxwayisa uzulu ukuba anakelele abaphila lomkhuhlane wengqondo.
“Sikhuthaza uzulu ukuba nxa kulomuntu olomkhuhlane wengqondo kababone ukuthi kuba lomuntu omncedisayo ukunatha amaphilisi akhe ngendlela eqondileyo ngoba kungenjalo bayingozi emphakathini,” kuphetha uCommissioner Nyathi.
Online Reporter