Online Reporter
UBESANDA kuphuma ejele ngecala lokubulala ayegwetshelwe lona owesilisa okuthiwa ubulele izelamani ezintathu eLulwane, eManguzi, eSouth Africa ngoMgqibelo.
Lo owesilisa kuthiwa ubotshwe ngeSonto ntambama, ngemva kokubaleka eqeda ukwenza lesi sehlakalo. Ababulewe ngesihluku esisabekayo ngoKwanele Gumede (15), Ayabonga Khumalo (7) lo-Amanda Khumalo (9).
Ngokutsho kukakhulu walezi zingane, uMnumzana Jobe Khumalo— noma kungacaci ukuthi bekubangwani — impi ibiphakathi kukayise wezingane lomsolwa.
“Okwamanje akucaci ukuthi ngempela bekubangwani, kakho ofuna ukusitshela njengomndeni ukuthi yini ebangele lesi sehlakalo. Umnakwabo kayise wezingane owenze lokhu, baqonywe yizingane zandawonye ezilamanayo.
Akwenzileyo kusizwise ubuhlungu obukhulu njengoba endlini la alimazele khona izingane, igazi belikhiwa ngendishi ngendlela ebeliliningi ngayo. Zonke impahla bezigcwele igazi, abantu besesaba lokungena endlini ngenxa yesimo izingane ebesiyizona,” kutsho uKhumalo.
Uveze ukuthi unina walezi zingane uhlukumezeke kakhulu ngalokhu, labo bengumndeni basadinga izimpendulo.
“Siyafuna ukukhuluma laye ukuzwa ukuthi bekwenzenjani? Umama wezingane laye akukho okutheni akuchazayo njengoba esitsho ukuthi wayengekho eyekhangela ibhizinisi lakhe elincane alenzayo, izingane wazitshiya zodwa.
Kuthe uma ebuya kula azithele khona phezu kwezingane sezitshonile. Ngabe ubaficile abazali balezi zingane asazi kumbe ubezakwenza okufanayo. Ubulala izingane nje, ingoba ubefuna ukubazwisa ubuhlungu, hayi ngoba ebefuna zona,” kubeka uKhumalo.
Usodolobho weMkhanyakude, uMnumzana Sphile Mdaka, ufike endaweni yesehlakalo waveza ukuthi izehlakalo ezifana lalesi kumele zisukunyelwe masinyane. Uthe amapholisa awaqinise ingalo yomthetho, aphangise abophe abantu abenze lokhu.
“Lumuntu owenze lesi sihluku ngilemibuzo ukuthi uqale wakwenza njani lokhu, uzibulale njani zonke, yena wangaba lozwelo? Ngelinjani leli dimoni ebelimngenile? Sizwa ubuhlungu kakhulu kungakho sila njengobuholi bonke ukuzohlanganisa amehlo lomndeni njengoba usidinga. Siyacela ukuthi amapholisa aqaphele umphakathi njengoba sesitholile ukuthi umuzi kamsolwa lawo utshisiwe,” kutsho uMdaka.
Okhulumela amapholisa KwaZulu-Natal, uColonel Robert Netshiunda, uthe umsolwa ubotshiwe wavela enkantolo izolo. —Isolezwe
