Online Reporter
YiNtatheli kaMthunywa
KULOMFUNDISI weZvishavane odonselwe emthethwandaba weKwekwe kulandela ukubhinya umfana oleminyaka engu-18 yokuzalwa olilunga lebandla lakhe leRedcliff.
Kusitatimende esikhutshwe yiNational Prosecuting Authority of Zimbabwe (NPAZ), umfundisi lo uhlukuluze umfana lo mhlaka 11 Ncwabakazi ngomnyaka ka2025 ngakibo kukamamangala lapho ayevakatshele imuli le.
“Umamangala waphaphama esebanjwa banjwa ngumfundisi lo. Wathi ebuza ukuba kungani embamba ngale indlela, umsolwa waphendula wathi “muhle kakhulu” njalo ukungabi lendevu kumenza azizwe angathi usembhedeni lowesifazana,” kutsho isitatimende seNPAZ.
Inkundla izwe ukuba umsolwa ngemva kokukhuluma amagama la wahlubula umamangala ibhulugwe ngapha emtshengisa umbhobho esithi uzamdubula nxa angahlaba umkhosi kumbe angachaza ngesehlakalo lesi.
Kubikwa walaya umamangala ukuthi alale ngesisu andubana ambhinye kathathu. Ngemva kokumhlukuluza okwesithathu wabuye wamlaya ukuba enze isenzo socansi kuye. Ngokwesaba, umamangala wakwenza lokhu.
Umsolwa wasuka emzini lo ekuseni. Kukanti umamangala wabikela uyisekazi ngesenzo lesi okwenza bayabikela amapholisa eRedcliff umfundisi wabotshwa.
Ukuthoniswa kwecala leli kudluliselwe kumhlaka 27 Ncwabakazi njalo umsolwa uzabe evalelwe ejele.
derick.khumalo