Online Reporter
Nkosilathi Sibanda
ABALIMI bakuleli ngeke bathole isivuno esihle kungela usekelo lezicebiso zabalimisi lezisebenzi ze-veterinary (vet).
Ngokunjalo umsebenzi wabalimisi labacebisi be-vet uqakatheke kakhulu, nanko ugatsha lweLands, Agriculture, Fisheries, Water and Rural Development selwethule ukuthi luzanikeza izicoco labo abasebenza kuhle kuzigaba zonke zelizwe.
Kubikwa izicoco lezi zizabizwa ngokuthi “The Best Agricultural Business Advisory Officer and VET of the Year Award”.
Ugatsha lolu lusungule izicoco lezi ngeviki edluleyo eBanket Sports Club, esabelweni seMashonaland West.
Unobhala wogatsha lweLands, Agriculture, Fisheries, Water and Rural Development uSikhwicamfundo u-Obert Jiri ubike ukuba umsebenzi wabalimisi kumele uphakanyiswe.
“Izicoco lezi ziphakamisa abalimisi bethu abasebenza gadalala. Babaluleke kakhulu kwezokulima kuleli,” kutsho uSikhwicamfundo Jiri.
Uthe uMongameli uMnangagwa ukhokhela uhlelo lokuphakanyiswa kwabalimisi ngokubanikeza imidududu, lemitshina yokusebenzisa.
“Ngokunikeza ulwazi lokwenza amabhizimusi ngokulima, abalimisi balethuba lokuncedisa abalimi ukuthi bakhweze isivuno lokugcina ukudla okwaneleyo elizweni,” nguSikhwicamfundo Jiri lo.
