Online Reporter
Langalakhe Mabhena
ABATHANDA umdumo wesiNtu koBulawayo bazathola ithuba lokuzithokozisa ngoLwesihlanu mhlaka 17 Ntulikazi lapho amaqembu acula ingoma zesiNtu, i-Sekunjalo MaAfrica Arts le-Uhlaba Usamila, azabe etshengisa ubungcitshi bawo emcimbini weKwaNtuthu After Dark — Kusihlwa ozakwenziwa e-Alliance Française de Bulawayo.
Kulumcimbi kuzaphinda kube lomculi we-Afro-jazz, Gog’ Bekezela, olindeleke ukuthi aphathise ngokuhlabelela kwakhe okuthandwa ngabanengi.
Umcimbi lo uhlelwe yi-Gobela Arts Development Agency ngokusebenzisana leSekunjalo MaAfrica Arts ngenhloso yokuthuthukisa ingoma zesiNtu, amasiko lokulandisa indaba ngendlela yokuhlabelela.
Abaqoqi bomcimbi lo bathe uzanika abantu ithuba lokuzizwela ubuhle bomculo wesiNtu lokunanza ilifa lamasiko ase-Afrika.
“Wozani lizozibonela ubuhle bomculo ophilayo, imidlalo egcwele amandla lokuvezwa kwamasiko ethu ngendlela eqotho.
“Libuye labangane lizothokozela iKwaNtuthu After Dark — Kusihlwa,” kutsho isaziso sabaqoqi bomcimbi.
Kulindwe ukuthi umcimbi lo udonse abantu abanengi abathanda amasiko lomculo wesiNtu njalo unike abaculi bendawo ithuba lokuqhubeka bekhuthaza ukulondolozwa kwelifa lesizwe.
