admin
Thokozile Mbedzi
KUSEHLAKALO esitshiye izakhamizi zeTokwani Ngundu eMasvingo zizidla amathambo engqondo, kulomfana oleminyaka engu-12 ofe ngemva kokukhatshwa ngomunye oleminyaka engu-9 bedlala umakhabana, uMthunywa ukuzwile lokhu.
Ngosuku lwesehlakalo kubikwa umuyi uTawanda Dowayi (12) wayedlala lalo okuGrade 1 mhlaka 20 Mfumfu aze akhatshwe.
Ngokuzwa kwephephandaba likazulu, kubikwa abafana laba babedlala umdlalo wokukhabana kodwa ngokusweleka kwenhlanhla lo omncane wathi ekhaba lo omdala wedlula emhlabeni.
Omunye umakhelwane uMnumzana Paul Moyo uthe lokhe bengakaqedisisi ukuba yisilingo bani ukuthi abantwana bangathi bedlala omunye acine edlule.
“Sonke njengabomakhelwane, lokhu sididekile silapha. Abantwana laba babedlala umdlalo wokukhabana esikolo lapho lo omncane akhaba khona uTawanda wahle wavuvuka umlomo.
“Umbalisi ebona ukuba uTawanda usevuvukile wathi kaphindele ekhaya lapho abadala abafika bamusa ekilinika eseduzane yeChisase bona abamdlulisela phambili eChiredzi Hosiptal.
“Babuyela laye ngekhaya bekhangelele ukuthi bamuse esibhedlela ngelanga elilandelayo kodwa kwahle kwamqinisa wacina esedlula,” kulandisa uMnu Moyo.
“Silokhu sizibuza imibuzo engadingimpendulo ukuthi kungabe kuhambe njani okubangele ukuthi abantwana bangathi bekhabane bebodwa kodwa kucine kulesidumbu phansi,” kutsho uMnu Moyo.
Isikhulumi samapholisa eMasvingo uInspector Kudakwashe Dewa ebuzwa ngodaba lolu uthe solufikile ehofisini yabo njalo basaluphenyisisa.
“Sichwayisisa udaba lwabantwana abakhabane bedlala esiqintini seTokwani Ngundu,” kuphetha ulnsp Dewa.
Online Reporter