Online Reporter
Sikhumbuzo Dabengwa
2. UNDABA
UNdaba uvezwe njengedelakhaya, umuntu ohamba atshiye imuli ihawula ekhaya . Sibona kugwalo uNdaba esiyasebenza koBulawayo atshiyele uyisekazi umkakhe labantwana ababili angaze abathumela ukudla, ngitsho letiki kodwa lokhu.
Sibuye simbone engumuntu ongathembekanga. Sibona kugwalo ephila lekhikhitha elingu Jenny alibale ngalo imuli isifa ngendlala ekhaya, bengumkhaza kuMaZulu uyisekazi.
Kacabangeli abanye. Sibona efulathela ikhaya umkakhe engasebenzi, engelamasimu okulima ukuze abelesiphala sokudla labantwana kodwa yena uNdaba azithokozise edolobheni ngekhikhitha elalingamthandi lifuna imali yakhe kuphela .
Siphinda simbone engumuntu odla esesulela phansi njengenkukhu, kabongi ukugcinwa afundiswe nguMaZulu lomkakhe owayeleholo eliphansi. Kunjalo uphinde abatshiyele umthwalo kamkakhe labantwana ababili.
UNdaba kugwalo uvezwe njengesidakwa. Sibona enatha utshwala aze abuye endlini ngobusuku eselindelwe nguGugu lezihluthulelo zendlu.
Kahloniphi umtshado wakhe. Sibona kugwalo ebuya lekhikhitha endlini yomtshado akutshaye indiva khona kusendlini kaGugu ababetshade bonke.
Uvezwe engumuntu ongelasineke. Wagulelwa ngabantwana wehluleka ukubamela ekubavakatsheleni esibhedlela.Wayenquma lamabhawa loJenny enganaki ukuba abantwana banjani.
Siphinda simbone engumuntu olesandla esilula. Kugwalo ufaka isandla uGugu emtshayela ukulwa loJenny. Endaweni yokuba azwele umkakhe wambeka isandla.
UNdaba siphinda simbone engumuntu olomoya wokuphindisela. Walanda uGugu wasola ukuba wayelempahla zonke ayezibona, wafuthelwa ecabanga ukuba kungabe uGugu wayezithengelwa ngamadoda akhe kanti hatshi wayesebenze kanzima uGugu ezimisele ukukhokhela konke ayekuboleke kuThulani.
UNdaba wayengumuntu olobuphukuphuku, ubuthutha. Wayengaboni ukuba uJenny kamthandi okweqiniso. Sibona uJenny ebuza kuGugu ngoThulani efisa ukuba amazi ngcono ukuze amephuce imali njengoNdaba.
3. UJENNY
UJenny uvezwe elikhikhitha elidla imali zamadoda abantu lingela ndaba. Sibona kugwalo ethandana loNdaba okwamanga ngoba uNdaba wathi esebotshiwe wabutha izimpahla zikaNdaba wayathengisa, wedlulela kwamanye amanondo ngoba lapha kwasekungasela mhluzi odlisayo.
UJenny kalanhloni. Uhamba loNdaba indoda yomuntu, aqhubeke ethandana layo lanxa ebona umkakhe ekhona. Lokhu kwaba yisibonakaliso sokuba wedlula zisengwa ngoba engomunye wayezadedela emuva.
UJenny wayengumkhaza omunya umuntu udlule nxa igazi lingasekho. Sibona kugwalo esethandana lomunye eLuveve okwenza uNdaba ayekulwa lalowo ndoda acine esebotshiwe.
Asihlanganeni kwelizayo bafundi.
