Online Reporter
Ethel Ncube
KULENDODA yePlumtree emiswe emthethwandaba isetheswa icala lokubulala ngemva kokugwaza elinye inina entanyeni ngeviki ephelileyo.
UPhathisani Ncube oleminyaka engu-32 yokuzalwa umiswe phambi kukamantshi uJoshua Nembaware omxwayise ukuthi abhalele emthethwandaba weHigh Court acele ebheyili.
Umtshutshisi uNkosazana Sheila Nyathi ubike ukuba umsolwa wayesebhawa aze agwaze uSehlile Mpofu ngoba emkhuze ngokudlalisa ingqamu.
“UPhathisani wayelokhu ekhipha ingqamu efuna ukugwaza abanye ayenatha labo utshwala ebhawa. USehlile Mpofu wamkhuza ukuthi kame indlela ayedlala ngayo.
“Kukhanya uPhathisani akuzange kumphathe kuhle wahle wagwaza uSehlile ngengqamu entanyeni. USehlile waqaleka wafa ngemva kwamahola ambalwa ngenxa yokopha kakhulu,” kulandisa uNkszn Nyathi.
Umantshi uJoshua Nembaware utshele umsolwa ukuba abhalele emthethwandaba weHigh Court acele ibheyili.
Okwakhathesi umsolwa uzabe evalelwe esitokisini elinde ibheyili.
Kusenjalo kulenye futhi indoda yePlumtree emiswe emthethwandaba ofanayo isetheswa icala lokuzama ukubulala umakhelwane wayo ngokumtshaya ngomphini ngeviki edlulileyo.
Umsolwa uMehluli Moyo uzabuyela emthethwandaba ngoLwesihlanu esiyathola isigwebo sakhe.
Umtshutshisi uSheila Nyathi ubike ukuba umsolwa watshaya omunye ngomphini ngemva kokungazwanani.
“Mhlaka 4 Ncwabakazi ngomnyaka ophelileyo uMehluli Moyo waba lokungazwani loCabangani Ndlovu. Umsolwa wathatha umphini wehloka wagongoda uCabangani ekhanda waphinda wamtshaya lezandleni wamlimaza ikhanda.
UCabangani wathwalelwa esibhedlela,” kutsho uNkszn Nyathi.
Ngemva kokulalela icala leli, umantshi uthe umsolwa aphenduke emthethwandaba mhlaka 16 Zibandlela 2026.
