admin
Thokozile Mbedzi
KULENDODA yeMenyezwa eLupane emiswe phambi komthethwandaba weLupane isetheswa icala lokubhaxabula umkayo kulandela ukumfica encinda uluju lwemvelo lomakhelwane.
Umsolwa uVusumuzi Ncube oleminyaka engu-45 yokuzalwa wesigabeni seMenyezwa umiswe phambi kukamantshi uNdumo Masuku kuviki ephelileyo esetheswa icala lokutshaya umkakhe uAttalia Khumalo oleminyaka engu-23 yokuzalwa.
Umtshutshisi kulelicala uNkosazana Zandile Lauren Ndebele ubikele inkundla ukuthi uNcube wephula umthetho obona ngokuhlalisana emakhaya, oweDomestic Violence Act CAP 5:16 ngokutshaya unkosikazi wakhe umzimba wonke okwabangela ukuthi alimale.
Ebuzwa ukuthi uyalivuma kumbe uyalilandula icala lakhe ulivumile.
“Nkosi, ngiyalivuma icala lami, uhlupho yikuthi ngathukuthela kakhulu ngifica unkosikazi wami owayevakatshile kibo encinda uluju lwemvelo lenye indoda.
Umsolwa uchazele inkundla ukuthi leyondoda yayingumakhelwane njalo wayitshaya yenelisa ukuphunyuka.
Incwadi kadokotela isetshenziswe njengobufakazi enkundleni njalo iveze ukuthi akulasikhali esasetshenziswayo.
UMantshi ugwebe uNcube inyanga ezilitshumi lambili andubana zesulwe zonke kukhangelelwe ukuthi angadali icala elifanayo kuminyaka emihlanu ezayo.
Online Reporter