admin
Thokozile Mbedzi
ZISELE zithithibele izakhamizi zesigabeni seRutenga eMwenenzi ngoLwesithathu kulandela ukuzwa ngoguluva abagqekeze koMukuru batshontsha imali engange US$10 000 kunye labomakhalekhukhwini.
Kubikwa amadoda amabili angaziwayo afika esitolo sakoN&R Wholesalers lapho okule-branch yeMukuru. Kuzwakale ukuthi sebephakathi badubula kabili emoyeni besethusela izisebenzi andubana babophe enye ikhasimende eyayilapho.
Ekhuluma lentatheli kaMthunywa uMnumzana Stanford Sibanda ongomunye olebhizimusi kule indawo uthe lokhe esevalweni ngoba wathi esizwa umsindo wesibhamu walunguza ngefasitela.
“Ngathi ngisizwa umsindo wombobho ngalunguza ngabona omunye waboguluva laba eme emnyango elindile abanye bephakathi.
“Ngethuka kakhulu njalo ngasengisehluleka lokuma ngoba ngicabanga ukuthi kungenzeka besuka kusitolo leso babuye kithi.
“Sebebophe ikhasimende eyayilapho bathatha omakhalekhukhwini ababiza $40 000 kunye lemali phakathi kwesisefa engange US$10 000 kunye leR110,’ kulandisa uMnu Sibanda.
Kubikwa beqeda ukuthatha imali yeMukuru balande isisebenzi sesitolo seN&R basilalisa phansi bathatha iUS$1 795 le$21 460 andubana babaleke ngemota yohlobo lwe-Toyota Probox engela ma-number plate.
Isikhulumi samapholisa esabelweni seMasvingo ulnspector Kudakwashe Dewa ebuzwa ngodaba lolu uthe solufikile ehofisini yakhe njalo basaluphenyisisa.
“Udaba lokugqekezwa lokutshontshwa kwemali yizigebenga ezihlomile solufikile ehofisini yethu ngakho sisaluphenyisisa,” kuphetha ulnsp Dewa.
Online Reporter