Online Reporter
YiNtatheli kaMthunywa
KULOMFANA weGokwe ogwetshwe ukuyapika iminyaka engu-90 ejele kulandela ukutholakala elecala lokudlwengula abantwana bomqhatshi wakhe abathathu, abaleminyaka emibili, eyisithupha lesikhombisa amahlandla ambalwa ngemva ngokubahuga ngama-jiggies.
UMarkwell Machena (18) wesiqintini seMachena ngaphansi kwenduna uNekamwe ugwetshelwe ukuyapika iminyaka engu-90 ngumantshi womthethwandaba weGokwe Regional, uMnumzana Stanford Mambanje, ngamacala ayisithupha.
Umantshi wephule iminyaka engu-45 okutsho ukuthi uzakuyapika iminyaka engu-45 ejele.
Inkundla izwe ukuthi uMachena wayeqhatshwe njengomsizi ngunina wabantwana laba abathathu.
Umtshutshisi uFatuma Tekera ubike ukuthi uMachena watshiywa labantwana laba phakathi kwamhlaka 28 lo 30 Mbimbitho unina engekho.
Kubikwa uMachena wahuga abantwana laba ngokubapha ama-jiggies ukuthi bangene ekamelweni lakhe lokulala lapho afika wababopha inyawo kunye lezandla ngentambo wabadlwengula belandelana.
Indaba le iphume egcekeni unina wabantwana ebafica ekamelweni likaMachena bengagqokanga.
Ekubabuzisiseni bachaza ukuthi badlwengulwe nguMachena okwenza wahle wayabikela amapholisa, umsolwa wabotshwa.
