Online Reporter
Nkosilathi Sibanda
BABUYELE emakhaya bejabula abalandeli beHighlanders, iqembu labo linqoba iCAPS United kumdlalo weCastle Lager Premier Soccer League ngeSonto, eBarbourfields koBulawayo.
IHighlanders inqobe nge 1-0, kuhlohle umgadli uReason Sibanda ngomzuzu wesibili, kuqale umdlalo. USibanda, obephakathi “komsindo wegedi leCAPS United” uhle walibethelela phakhathi, kwathula izethekeli, kwajabula inkundla yonke. IBosso ibisiqede imidlalo emithathu ingutshiki lobhanqa kumidlalo yayo, lokhe kwaqala isizini yalonyaka.
Lo, bekungumdlalo wesibili iHighlanders inqoba isekhaya.
Ngokuya komdlalo lo, iBosso bekumele ihlohle amabhola amanengi, kodwa isuke yaba buthundu, yehluleka ukuqedisa amabhola amahle phambi kwegedi.
Ngemva kwemizuzu engu-30, iHighlanders iqhubeke ikhokhela nge 1-0.
Kuphose kwenzeka okunye, izivakatshi sezibuya ngomfutho, Ngomzuzu wesi-20, kuncede uTalent Dube, oweHighlanders ovimbe ibhola ebeliqonde phakathi kwegedi ngesikhathi esifaneleyo. Isilile iBosso lapho.
Ngomzuzu, wesi-35, unozinti weHighlanders uReward Muza, ulibambe lingakangeni emambuleni, iCAPS United izama ukusondela. Umdlali wayo, uHastings Chapusha kwehlule ukuthi abhoboze
umambule.
IBosso izabonga imvimbi yayo u-Arthur Ndlovu ngesikhathi ekhabela khatshana ibhola elivele kuJuan Mutudza, ebeliqonde nta egedini. Lakanye kuze elinye livela ekhanda likaLove Mabiala kodwa unompembe uthe kalizange ledlule umzila wegedi.
Kuphethe kunjalo, iHighlanders ithethe imiklomelo yonke. ICAPS United ingene umango, iqonde eHarare ingelalutho.
Amaqembu:
Highlanders:
Reward Muza (gk), Talent Dube (Brian Mlotshwa, 63mins), Arthur Ndlovu, Melikhaya Ncube, Reason Sibanda (McKinnon Mushore, 78mins), Prince Ndlovu (Hubert Ncube, 63mins), Malvern Hativagoni, Brighton Ncube (Tendai Muvuti, 78mins), Mason Mushore, Never Rauzhi, Luckmore Mutumbi
CAPS United:
Harmony Nare (gk), Kelvin Mangiza, Kundai Benyu (Eric Manokore, 65mins), Bruce Kangwa, Hastings Chapusha, Brighton Manhire, Phineas Bhamusi, Love Mabiala (Junior Bunjira, 65mins), Tanaka Shandirwa, Juan Mutudza (Jayden Bakari, 75mins), Joseph Mbollo
