Online Reporter
Ethel Ncube
ZIKHALELWE ngamasongo kasigonyela izigelekeqe zeGwanda ebesezihluphe eGuyu, ezitolo zeGwanda kunye le-West Nicholson ngokugqekeza, lokudubula zibulale abantu kusukela ngoMpandula womnyaka ka2024 kusiya kuLwezi womnyaka ofanayo.
Obekhokhela izigelekeqe lezi, uRespect Khumalo (22) uphiwe isigwebo sokupika iminyaka engu-32 ejele, uOnias Tembo (19), uphiwe isigwebo seminyaka engu-16, kuthi uMokesi Ndlovu uphiwe iminyaka emine.
I-National Prosecuting Authority iveze ukuba iqembu lezigebengu leli belihamba lihlome ngombhobho, amabhemba, amahloka, i-pepper spray kanye lamatshe emzini yabantu litshontsha.
“Omamangala bebehlukunyezwa, bedutshulwa befafazwa emehlweni nge-pepper spray. Emacaleni abawadalayo kulecala lokuzama ukubulala isakhamuzi seSpitzkop lokudubula unogada wegaraji le-Energy Park Service Station.
Iqembu leli lalihamba lidubula lapho elaligqekeza khona latshontsha imota yohlobo lweToyota Vitz, imali, utshwala, impahla zendlini kunye lempahla ezisebenzisa amagetsi,” kubika i-NPA.
I-NPA iveze ukuba umantshi uGillian Padzakashama wabapha izigwebo ezinzima ekhangele amacala abawadalayo.
“UKhumalo uzapika iminyaka engu-32 ejele kuthi uTembo uzapika iminyaka engu-16 kuthi uNdlovu uzapika iminyaka emine. Amacala obudlwangudlwangu asiwavumeli, siqakathekisa ukuvikeleka komphakathi. Ukuvikela umphakathi siyakuqakathekisa,” kuphetha i-NPA.
