Online Reporter
YiNtatheli kaMthunywa
NGENXA yokuthanda uMagwebu, kulendoda eleminyaka engu-25 yeGokwe etshontshe inkomo kayise yayithengisa ngoba ifuna ukuyathenga utshwala.
Indoda le, uBhekimpilo Madzura oleminyaka engu-25 yokuzalwa umiswe phambi komthethwandaba weGokwe watholakala elecala lokutshontsha inkomo wagwetshwa ukuthi ayepika iminyaka eyisificamunwe munye ejele.
Umtshutshisi kulelicala ubike ukuba uMadzura mhlaka 7 Mfumfu walandela inkomo zikayise emadlelweni wafika waqhuba eyodwa wayayithengisa.
Kubikwa umnewabo wabona umnawakhe endaweni yamabhizimusi eqhuba ithokazi ayelitshontshile elibophele. Enanzelela ukuba kukhona okutshaya amanzi wagijima wayabikela uyise owahle wayabikela amapholisa.
Ukuchwayisisa kwamapholisa kwaveza ukuba inkomo yayisithengiselwe omunye umkakhelwane nge-US$290 yona ibiza
US$380. Inkomo le yathathwa yabuyiselwa kumnikazi.
I-NPAZ ithe: “Ukutshontshwa kwezifuyo kuvamile emaphandleni futhi kuphambanisa impilo zalabo abazifuyela ukuziphilisa. Sikhuthaza uzulu ukuba abikele amapholisa nxa kulensolo abalazo ezingacina zibangela ukutshontshwa kwezifuyo.”
Ithe isigwebo lesi senza kucace ukuthi ukutshontshwa kwezifuyo akufuneki, ikakhulu endaweni lapho inkomo eziyinotho yemuli.
