Online Reporter
Fungai Muderere, Thatha Scott, uyisikhokho!
Yiwo umbono womdlali wamaWarriors ophinda atshibilikele iFC Cincinnati eMelika, uTeenage Hadebe osetshayele ihlombe umnikazi weScottland FC, uScott Sakupwanya kulandela ukwenza kuhle kwaleliqembu lisiba yintshantshu yeCastle Lager Premiership.
Ukuze aqinisekise ukuhalalisela kwakhe, uTeenage ubike ukuba uzanikeza uSakupwanywa isikipa sikaLionel Messi. UTeenage utshintshane izikipa loMessi kumdlalo wabo odluleyo kuMajor League Soccer (MLS).
IFC Cincinnati idlale le-Inter Miami ngeSonto edluleyo kuhlandla lama semi-final e-Audi 2025 MLS Cup Eastern Conference, lapho enqotshwe khona 4-0.
Ngemva kwalumdlalo, uTeenage loMessi batshintshane izikipa, wasebika ukuthi ufuna ukunikeza uSakupwanya isikipa sikaMessi.
“Ngikuphathele okuthile okuhle. Ngiyethemba uzakuthanda,” kubika umdlali lo enkundleni zokuxhumana.
Kuvidiyo ayifake ebulenjini, uTeenage utshayele iScottland ngokunqoba kwayo umkhankaso weCastle Lager Premiership.
“Sithanda ukukuhalalisela, ithimba labaphathi beqembu, abadlali kunye labo bonke ababambe umsebenzi kuScottland Football Club ngokunqoba isicoco seligi,” kutsho uTeenage.
Kusenjalo, ikontileka lomdlali lo leFC Cincinnati liphela mhlaka 31Mpalakazi. Amahemuhemu athi iqembu lisamfuna.
“Basafuna ukuthi ebadlalele ngoba udlale kuhle. Kungenzeka bavuselele isivumelwano,” kutsho umfakazi lo.
UTeenage ungene kuFC Cincinnati ngoNcwabakazi ngomnyaka odluleyo, ngesivumelwano sokudlala isizini eyodwa lengxenye.
Ekhuluma ngekusasa yakhe, umdlali lo uthe: “Ngizahlala phansi ngicabange, ngime kancane. Okwakhathesi ngeke ngitsho amanengi. Ngizalinda.”
