admin
Ethel Ncube
KULEMULI yeLupane, eTshongogwe ehlelwe ngamashwa ngemva kokuba omunye welunga lemuli eganyulwe ngehloka wafa kucatshangelwa ukuba utshontshe imali yamakhasi.
Isiga lesi senzakale ngeviki ephelileyo lapho uMnumzana Trust Ndlovu ebulele umngane wakhe uMnumzana Themba Ndlovu kubangwa ukuba utshontshe imali etholakale ekutshoveni amakhasi, uMthunywa ukuzwile lokhu.
Ekhuluma lentatheli uMnumzana Danny Ndlovu uveze ukuba lokhe besadidekile ngesiga lesi sokuganyulwa komuntu ngemali yamakhasi.
“Umuyi wayezihambela ngenqola yakhe wahlangana lomngane wakhe evele emthwalele efuna ukumgamula ngehloka isizatho siyikuba kulemali yamakhasi etshontshiweyo.
“Abafana laba bebekubhizimusi yokutshova amakhasi bobabili, uhlupho luvele omunye esecatshelwe yimali. Lathi samuzwa esesithi usecatshelwe yimali sesiyabulala umuntu sangabi lendaba sithi mhlawumbe uyazikhulumela nje,” kutsho uMnu Ndlovu
Uqhubekele phambili echaza ukuba abazange bebelenkani sebesizwa kuthiwa uThemba useganyuliwe.
“Sethuka sesibizwa sokuthiwa uThemba useganyuliwe njalo usefile. Kuthiwa umsolwa wabona umuyi ezihambela wamgijimela wamethesa icala lokuthi ulisela wahle wamhlahlela ekhanda wawa enqoleni wahle wafa, kubangwa imali yamakhasi nje kuphela.
“Ngesikhathi umabulala ekhuluma esithi uzabulala umuntu sazama ukumbuza ukuthi yimalini wangavezi ukuba yimalini ayithole emakhasini. Lokhu kusizwisa ubuhlungu ngoba lomuyi owayesetheswa icala mhlawumbe kayithathanga, usefele ifufu. Umabulala usezandleni zamapholisa, silinde ukuba umthetho uthathe indawo yawo,” kutsho uMnu Ndlovu.
Imizamo yokuxhumana lesikhulumi samapholisa uInspector Simphiwe Makonese yehlule ngoba kuthiwa kakho usemaphandleni ngomsebenzi.
Online Reporter