admin
YiNtatheli kaMthunywa
INHLANGANISO ephethe umdlalo wenguqu kuleli kubikwa kayisebenzi ngendlela efaneleyo.
Iphephandaba likazulu selikhulume kwaze kwagcwalisiswa amazwi kaEzra “Tshisa” Sibanda ukuba linhlanganiso iyehluleka ukuqhuba umsebenzi wokuphatha amaqembu esizwe.
Uchuku oluboniswe abantwana abadlalela isizwe kuqembu labesifazane abaleminyaka yokuzalwa engaphansi kwetshumi lasikhombisa kutshiye iZimbabwe Football Association ihlezi egcekeni.
USibanda, ongusaziwayo kwezomsakazo njalo engumlandeli wenguqu, uphenduke waba yisitha seZifa ngenxa yokuveza emphakathini ukuthi inhlanganiso le ipheke imboza.
Kulandela uphenyo olwenziwe nguSibanda ngodaba lwabadlali, iZifa ihlasele umsakazi lo ingazi ukuba isiqale insindabaphenduli.
Impi le, ngokubona kwephephandaba likazulu, iqakatheke kakhulu ekuguquleni isimo senhlanganiso yeZifa langendlela ephatha ngayo umdlali.
IZifa yale yemba phansi ukuthi yenza iphutha ngendlela eyaphatha ngayo iqembu lesizwe ngesikhathi lilungiselela ukudibana lesizwe se-Botswana.
Okwakuqala, uEzra ubonise abalandeli labathandi bomdlalo wenguqu ukuba iZifa ayenzanga lutho ukulungiselela lumdlalo. Njengokutsho kwephephandaba likazulu, iZifa ibigcine abadlali esikolo se-Eveline, abantwana abangabadlali bengahlalanga kuhle kubikwa kodwa izikhulu bezithe pekle emahoteleni.
Kuthe dlwe emehlweni eziphathamandla zeZifa ngoLwesibili kuliviki ukuthi indaba le isegudwini.
USibanda uqale udaba lwakhe lokuveza okwenzakalayo anduba umdlalo weZimbabwe leBotswana uqale.
IZifa ayizange ithathe isikhathi eside ilandula icala layo.
“IZimbabwe Football Association ayivumelani lembiko yokuthi ithwalise nzima iqembu lesizwe elamankazama awe-Under 17 ngesikhathi esenkambeni yokulolongela umdlali wabo leBotswana kumkhankaso weWorld Cup.
“Isikolo se-Eveline High lapho obekuhlezi khona iqembu silezakhiwo zokuhlala ezibatshazwayo koBulawayo. Njengenhlanganiso, asazi lutho ngendubo ezivezwa nguMnumzana Sibanda.
Kusegcekeni ukuthi uEzra Sibanda ulamanga, udinga ukubonwa. Ukwazi njani okudingwa ngabantwana abangamankazana. Ama-Young Mighty Warriors athole lonke usekelo oluvela kuZifa,” kutsho umbiko weZifa.
Inhlanganiso le yengeze ngokuthi uEzra ungumcuphi.
Lokhu kuza ngemva kokuba isiphathamandla seZifa uBryton Malandule eyale ukuthi uEzra Sibanda labanye bakhe banikeze iqembu lama-Under 17 isipho sokudla lempahla ngempelaviki.
U-Ezra uphendule wathi: “IZifa yinhlanganiso yomphakathi. Sikhangelele ukuthi linhlanganiso ibelobuntu, yekele ukwenza umsebenzi wayo ngendlela eyangisayo lokuthi ingakhuphi imbiko eveza ukuswela ubungcitshi emsebenzini wayo,” kutsho uEzra ephendula iZifa.
“Ukuphambanisa ngokomuntu wonke ngakho iZifa ayivume ukuthi yaphambanisa. Ukuchitha isikhathi iZifa igcona mina akuncedi lutho. Icala likhomba kubo eZifa.”
Usaziwayo wezomsakazo lo uveze ukuba ama-Under-17 amantombazana la, ayegcinwe endlini ye-Eveline High engasetshenziswayo.
“Iqiniso yikuthi amankazana ebehlala endlini yakudala, engasasetshenziswayo esikolo se-Eveline. Ngazibonela mathupha. Ngithi iZifa ayiphumele egcekeni, nxa kusenza ingihambise emthethwandaba,” kutsho uEzra.
Online Reporter