admin
Msilisi Dube
UHLELO lwe-National University of Science and Technology Secondary Schools Enhancement Program (Nustsep) solusiya lusabalala ezabelweni zelizwe nanko phela kukhanya luphathisa abafundi kuzifundo zabo zenombolo.
Uhlelo lolu lwaqalisa ngemva kokukhonona kukazulu ukuthi iyunivesithi ye-Nust kayibathathi abantwana abangela zifundo zenombolo.
Ekhuluma lephephandaba likazulu, uMnumzana Felix Moyo obona ngezokuhanjiswa kwembiko eyunivesithi le, uthe basungula uhlelo lolu ngemva kokuzwa izikhalazo zikazulu ngakho babona kufanele ukuba bancedise abafundi laba ukuze baphumelele ezifundweni zabo.
“Uhlelo lolu lwasungulwa ngo-2008 ngemva kokunanzelela ukuthi inengi labafundi kalenelisi ukufunda kuyunivesithi yethu ngoba bengela zifundo zenombolo.
“Okwakhathesi uhlelo lolu solufinyelele abantwana abaphuma ezabelweni ezithi i-Matabeleland South, Matabeleland North kanye lakoBulawayo.
“Uhlelo lolu lukhangelelwe ukuqala njalo esabelweni seNkabazwe, njengoba labo sebetshengise ukuthi bayalufuna uhlelo lolu,” kulandisa uMnu Moyo.
UMnu Moyo uphethe ngokuthi uhlelo lolu seluphathise abafundi abanengi nanko phela sekulabafundi abedlula amakhulu amabili asebephumelela kuzifundo zenombolo ngemva kokuphatheka kulo okwenza benelisa ukungena eyunivesithi.
“Inengi labafundi selisenza ngcono ezifundweni zenombolo kungakho-ke sikhangelele ukuthi loluhlelo lufinyelele zonke izabelo zelizwe ukuze imfundo yakuleli ithuthuke,” kuphetha uMnu Moyo.
Online Reporter