admin
UMAKHOSINI Hlongwane uMphathintambo wezemidlalo kuhulumende uthe uzaphundla wonke amahofisi enhlanganiso zemidlalo kuleli ukuze akhiphe yonke “ingcekeza”.
UHlongwane uveze egcekeni ukuthi zonke inkokheli ezingaqhubi kuhle umsebenzi wazo kazisoke zitshonelwe lilanga ngoba uzazixotsha. Umphathintambo lo, osanda kungena esihlalweni ukhulume lokhu kuliviki wathi ihofisi yakhe isiqalisile ukuhlaziya indlela ezemidlalo ezibuswa ngayo.
“Bonke abangezi kuhle kunhlanganiso ezithile kumele bakhitshwe. Akufihlwa ukuthi lesi yiso isizatho sokwehluleka kwethu kweminye imincintiswano.
“Ihofisi yami isiqalisile ukulungisisa konke lokhu. Inguqu ayisiyo yodwa ephethwe yinkinga yokuba lenkokheli ezitshaphaza umdlalo. Sesinanzelele ukuthi kuleminye imidlalo engalandeli izinqumo zobukhokheli.”
Uthe zikhona inkokheli eziqhuba kuhle kodwa kulezinengi ezingamahlongandlebe ezingafuni ukukhula kwethalenta lezemidlalo.
Walile ukuqamba amabizo abantu laba wathi uzabaveza ngokuya kwesikhathi.
“Sengiwatholile amabizo alabo abangezi kuhle njalo ngikhangelele ukuthi ngenze umhlangano kuzabelo zonke ukuze silungisise okunye okusasilela,” kutsho uHlongwane.
UHlongwane ubike ukuba ubethwele nzima ecabangisisa ukuthi uzaguqula njani ezemdlalo kodwa icebo ubelalo ngemva kokuhlanganisa ingqondo ngemva kokuvakatshela inkundla lenkokheli ezithile. Ukhulume lokhu eselula ukuba ukuze iZimbabwe yenze kuhle kumincitiswano yaphezulu inyathelo lakuqala ngelokuthi kuvulwe isikhwama semali esizancedisa inhlanganiso ezehlulekayo.
“Ugatsha lwezemidlalo seluvule isikhwama esibizwa ngokuthi yiSport Development Fund. Isikhwama lesi ngesokuthi kube loncedo oluthile olunikezwa amathimu. Sikhangelele ukuthi imali engena esikhwameni lesi iphume kungatsha ezinengi ezifana lohulumende lamankampani.
“Olunye uhlupho olukhona ngolwemali. Asingeke sikubalekele lokhu. Nxa silungisisa indlela esikhokhela ngayo kuba lula ukucela imali. Ngubani ongaphathisa ngemali nxa silenkokheli zemidlalo ezinjengalezi esilazo? Siqala khonapho-ke, ngokukhankasela ukuvula iSport Development Fund.”
UHlongwane uthe nxa kusenza uzachitha wonke amabhodi kuqalwe kutsha.
“Bekungalula, kulandela ukubopha isinqumo sokuthi sidilize amakomithi amadala, besingaphumuli, sizama ukuthi ilanga ngelanga siphume lezinqumo ezizanceda imidlalo yethu.”
“Ngiyathokoza ngokuthi ama-stakeholders ahlangene njalo lami ngikhangelele ukuthi ngethule umsebenzi ozathokozisa wonke umuntu. Okuqakathekileyo yikuthi abantu kumele bacebisane ukuze kungabi lenkethabetshabi, izinto zicine zingahambi ngendlela,” kuqhuba uHlongwane.
Uqhubeke wathi uyakholwa ukuthi iZimbabwe izancintisa kumkhosi weWorld Cup ka2022 noma kanjani.
AmaWarriors bekuzwakale ukuthi kasoze adlale kulumkhankaso ngoba inhlanganiso yeZimbabwe Football Association yavoxa udaka. “Ngifuna ukwazisa isizwe ukuthi iZimbabwe izancintisa kuWorld Cup ka2022.”
Ngemva kokuchithwa kwenkokheli ezitshaphaza ezemidlalo, uHlongwane uthe uzaxwayisa inhlanganiso yeSports and Recreation Committee (SRC) ukuthi iphume lezinqumo eziqineleyo ezenqabela ubugwelegwele kwezemidlalo.
Online Reporter