adminISIKHULU se-Orlando Pirates uFloyd Mbele (ofanekisiweyo) sixwayise abadlali beZimnyama ngobungozi bokuzithwala kulandela ukudlulela kowamanqamu weCaf Confederation Cup.
Kowamanqamu iBucs izoshukana ne-Etoile du Sahel yaseTunisia ekhaya nasekuhambeni. Umlenze wokuqala uzodlalelwa e-Orlando Stadium ngoNovemba 20 bese kuthi owesibili ube seTunisia ngoNovemba 29. Leli qembu laseTunisia lizibekisele indawo kowamanqamu kulandela ukutitinya iZamalek yase-Egypt ngo 5-4 sekuhlanganiswe umphumela womdlalo wokuqala nowesibili.
NgeSonto iPirates iqophe umlando ngokuba yiqembu lokuqala eNingizimu ne-Afrika ukufinyelela kowamanqamu weConfederation Cup nakoweCaf Champions League. IKaizer Chiefs yilona kuphela iqembu laseMzansi eselake lanqoba iConfederation Cup eyayinqoba ngo-2001. IBucs ivithize i-Al Ahly ngo 4-3 eSuez Stadium, e-Egypt emlenzeni wesibili womdlalo owandulela owamanqamu weConfederation Cup. Emlenzeni wokuqala iPirates yanqoba ngo 1-0 wegoli likaThamsanqa Gabuza e-Orlando Stadium, eSoweto, eGoli.
Sekuhlanganiswe umphumela womdlalo wokuqala nowesibili. UMbele exoxa neSolezwe, ese-Gibhithe izolo ekuseni, udonse abadlali bePirates ngendlebe ngokuthi umsebenzi awukapheli.
“Kunzima ukubhiyoza njengamanje ngoba umsebenzi awukapheli. Akumele sijabule kakhulu kube sengathi sesiwine isicoco. Umsebenzi awukapheli. Sinemidlalo emibili yamanqamu okufanele siyidlale ne-Etoile du Sahel. Sonke siyaziqhenya ngokwenziwe yiqembu. Ukushaya iqembu elihlonishwa yi-Afrika akumele sikufake ekhanda. Kufanele kusigqugquzele kusifake nogqozi. Konke kulele ezandleni zabadlali ekutheni bazibhalele owabo umlando ukuze singalokhu sikhuluma ngempumelelo ka-1995 (abawina ngawo i-Caf Champions League),” kusho uMbele.
IPirates isethubeni lokubalwa nezikhondlakhondla zamaqembu eseziziqubule zonke izicoco zeCaf ezimqoka (iChampions League, Confederation Cup neCaf Super Cup). Amaqembu aseke aziqubula zonke lezi zicoco yi-Al Ahly, TP Mazembe yaseDRC Congo, Esperance neDu Sahel base-Tunisia, JS Kabylie yase-Algeria neHeart of Oak yaseGhana.
Ngo-1995 iPirates yawina eseCaf Champions League, ngo-1996 yawina eseCaf Super Cup ihlula iDu Sahel.
“IPirates iyiqembu elikhulu e-Afrika. Lokhu kufanele ikukhombise ngokukhonya emiqhudelwaneni yeCaf. Amaqembu afana neBarcelona (yaseSpain) neBayern Munich (yaseGermany) abalwa nahamba phambili e-Europe ngenxa yokuthi enza kahle emiqhudelwaneni ye-Uefa. Ngo-1995 sinqobe iChampions League, ngo-1996 sanqoba iCaf Super Cup, ngo-2006 sifinyelele kowandulela owamanqamu weChampions League, ngo-2013 sashaywa kowamanqamu weChampions League njengoba manje sesifike kowamanqamu. Osekusele manje wukuthi sisiwine isicoco,” kusho uMbele.
IDu Sahel ezodlala nePirates ayilona iqembu elilula. Ngo-2007 ibe ngompetha beChampions League kwathi ngo-1997, 2003 nango-2006 yakhala yemuka neseConfederation Cup. Ngo-2004 nango-2005 bashaywe kowamanqamu weChampions League. Ngo-2004 bashaywa yi-Enyimba yaseNigeria kwathi ngo-2005 baqunjwa phansi yi-Al Ahly. Ngo-1995 nango-1996 leli qembu lidle umhlanganiso kuCaf Super Cup kwathi ngo-1996 nango-2001 lalala endaweni yesibili.
Online Reporter