Online Reporter
YiNtatheli kaMthunywa
UHULUMENDE usegcone isenzo sokubulawa komntwana oyinkazana oleminyaka eyisithupha yokuzalwa, ngenxa yokuthi wehluleka ukuloba ibizo lakhe.
Umntwana lo wabulawa ngumalumakhe uTakudzwa Wellington Chimutsa (28) mhlaka 18 Zibandlela esiqintini seKoisvoro eZvishavane, esabelweni seMidlands.
Umalume lo kuthiwa watshaya umzukulu wakhe mhlaka 18 lo 19 Zibandlela.
Amapholisa abike ukuba mhlaka 18 Zibandlela ngehola lika 5 ntambama, uChimutsa wathi evela emsebenzini waseqala ukufundisa umzukulu wakhe ukuloba ibizo lakhe.
Umntwana kuthiwa wehluleka ukuloba ibizo lakhe okwenza uChimutsa wathukuthela, waseqala ukumtshaya. Waqhubekela phambili ngokumtshaya ngoswazi lwephane. Mhlaka 19 indoda le yaqhubekela phambili ngokutshaya umntwana lo okwenza ukuthi uswazi luqamuke andubana ithathe umchilo yaqhubeka imtshaya.
Mhlaka 21 Zibandlela, umntwana lo waqala ukuphelelwa ngamandla emzimbeni, ekhala ngobuhlungu emzimbeni.
Amapholisa abike ukuba uChimutsa uthe ebona ukuthi uselimaze umntwana, wamhambisa kumphurofethi, endaweni yokuthi aye esibhedlela.
Umphurofethi lo kubikwa wabakhulekela wasesithi babuyele emzini wabo.
UChimutsa wacina emusa esibhedlela seZvishavane District Hospital lapho umntwana edlula emhlabeni esadinga ukwelatshwa.
Kusenjalo kumbiko owethulwe lugatsha lwePublic Service, Labour and Social Welfare ngoMvulo kuviki le, uHulumende uthe ngeke avumele udlame ebantwaneni.
Esethula lumbiko kulandela isehlakalo lesi, unobhala wePublic Service, Labour and Social Welfare uMnumzana Simon Masanga uthe: “Lokhu kuyephula inhliziyo. Kuyisikhumbuzo esibuhlungu sokuthi kumele sithande abantwabethu, sibavikele, hatshi ukubajezisa ngendlela ebeka impilo zabo engozini,” kubika uMnu Masanga.
Abazali bacetshiswe ukuthi bondle abantwana ngendlela efaneleyo.
“Abantwana bakhula kuhle nxa bewondlwa ngendlela ebakhuthazayo langenhlonipho. Ukubakhuza kumele kwenziwe ngendlela enhle engelangozi.
“Sikhuthaza imuli ukuthi zithole usizo, zikhulise abantwana ngokubafundisa okuyikho endaweni eziphephileyo, lapho abakhula belokuzethemba lesithunzi.”
Umphakathi uxwayiswe ukuthi amangale amacala okuhlukunyezwa kwabantwana.
“Ukulahlekelwa ngumntwana ngenxa yodlame kuyinto embi kakhulu, njalo kumele umphakathi uqinisekise ukuthi akulamntwana ozahlupheka ngaleyo ndlela futhi.
“Siyakuqinisekisa ukuthi akuladlame loba ukuhlukuluzwa okungaguqula ukwenelisa komntwana. Kufuneka inkuthazo losekelo kuphela.”
