Bongani Ndlovu
Nkosilathi Sibanda
IZIZALWANE zakuleli eziseSouth Africa ezifuna ukuphenduka ekhaya, zizaphathiswa ngazo zonke indlela, ngokubika kogatsha lweLocal Government and Public Works.
Kumbiko okhitshwe ngeSonto, ugatsha lolu luthe luzasebenzisana leCivil Protection Unit ukuqinisa imizamo yokudinga usizo lokwakha ubudlelwano lenhlanganiso ezehlukeneyo okugoqela amankampani azimeleyo, inhlanganiso zosizo, ama-NGO lenhlanganiso zamabandla ukuze kusekelwe ukuphendukiswa kwezizalwane zakuleli.
Imizamo le ehlelwe ngokubambisana kogatsha lweLocal Government and Public Works leForeign Affairs and International Trade ihlose ukuqinisekisa ukuthi izizalwane ezithintekayo ziphenduke ekhaya ngokuphepha langesizotha.
“Usizo oluqoqwayo luhlanganisa ukudla, indawo zokuhlala okwesikhatshana lezimota zokuthuthisa abantu zisuka eSouth Africa,” kutsho umbiko ovele kuLocal Government and Public Works.
“Ngaphezu kwalokho, uHulumende usebenzisa i-Emergency Fund ukuqoqa olunye usekelo. Kuze kube khathesi, ugatsha sekhulumisane lenhlanganiso ezingaphezu kwezinhlanu esezinikele ekusekeleni lumsebenzi.”
Ugatsha lweLocal Government and Public Works lubike ukuba lwamukela loba yiluphi usizo olungavela kumankampani azimeleyo, inhlanganiso zosizo lwabantu ukuze kuqiniswe imizamo yokubuyisa izizalwane zakuleli leminye imisebenzi yeCivil Protection ehlose ukuvikela umphakathi lokusekela abantu abasengozini.
“Izigaba ezithile zikaHulumende sezivuselelwe umsebenzi wokwamukela ababuyayo emingceleni lasemphakathini ukuze kube lula ukuthi bayefika kuzimuli zakwabo.
“Sithanda ukubonga inhlanganiso labantu abaqhubeka bebambene loHulumende ukugcwalisa indingeko zoluntu ezikhona,” kutsho lolugatsha.
Online Reporter