Bongani Ndlovu
Nkosilathi Sibanda
INTSHA yakoBulawayo ibuthene eLobengula Hall emhlanganweni oqondane lezempilakahle yezocansi eyeSexual and Reproductive Health and Rights (SRHR), ngaphansi kohlelo oluqhutshwa yiParliamentary Youth Caucus ngokubambisana leSADC Parliamentary Forum.
Uhlelo lolu, oluqale ngoMvulo, luhlose ukukhuluma ngenkinga ezibhekane lentsha ekutholeni usizo lweSRHR lokudingisisa izixazululo ezinganceda ukuthuthukisa impilo yabatsha.
Ilunga lePhalamende leMakhandeni-Luveve, uDescent Bajila, ekhuluma lentsha kulindawo, uthe ukuqakathekile ukuthi abatsha baphume ngobunengi bezokhuluma ngendaba ezibathintayo.
“Abasakhulayo bayikusasa yelizwe. Kubalulekile ukuthi bathole ithuba lokukhuluma ngenkinga abalazo lokwabelana imibono engancedisa ukuguqula impilo. Indaba zeSRHR akumelanga zibe yinto esiyibalekelayo ngoba zithinta impilo, ikusasa lentuthuko yentsha,” kutsho uBajila.
Abanye abasakhulayo abakhulume loMthunywa bathe balethemba lokuthi umhlangano lo uzabanceda ukuthola ulwazi oluqondileyo ngezempilakahle lamalungelo abo.
“Sibhekane lenkinga ezinengi, okugoqela ukuswela ulwazi oluqondileyo. Siyajabula ukuthi sesithole ithuba lokukhuluma ngalezi indaba ngokukhululeka,” kutsho uMillicent Tshuma oweMagwegwe.
Umkhankaso lo uzakhangela njalo indlela zokuthuthukisa ukutholakala kosizo lweSRHR, ukusabalaliswa komkhankaso wokwenqabela ukumemetheka kwegcikwane leHIV leAIDS.
Ngemva kwalumhlangano koBulawayo, ingxoxo zizadlulela kwezinye indawo elizweni ezigoqela eMasvingo, Kwekwe, Kadoma leEpworth.
Imihlangano le izaqhutshwa kusukela mhlaka 22 kusiya ku-26 Nhlangula.
Online Reporter