Online Reporter
YiNtatheli kaMthunywa
UHULUMENDE uzimisele ukuba ilizwe liphathe imidlalo yeCosafa Under-17.
Amazwe alitshumi lanye azethekelela kuleli ngeviki ezayo ezodlala kulumqhudelwano wabasakhulayo, owabafana abaleminyaka yokuzalwa engaphansi kwe-17.
NgoLwesibili, esethekelela abafana beUnder-17 abalungiselelayo eEaglevale High School eHarare, uMphathintambo wezemidlalo kuHulumende, u-Anselem Sanyatwe, uthe uHulumende uzasekela inhlanganiso ephethe ibhola kuleli iZifa. Uthe ulesifiso sokuthi amazwe azethekelela aphatheke kakuhle emqhudelwaneni.
“Kumele siphe izethekeleli zethu isiphatho esiphezulu. Saziwa njengelizwe elilesiphatho esihle kuzethekeli zethu. Ngibathembisa ukuthi konke sekuhleliwe njalo labanye okusetshenzelwana labo balungele ukuthi babone ukuthi kuhamba kuhle,” kutsho uSanyatwe.
Ugcizelele esithi: “Ngizwabethi kulamazwe alitshumi lanye azabuya ukuzodlala avela esigabeni. Ngisemsebenzini ekuseni lamhlanje bengisaziswa ngumgcinisihlalo weZifa ukuthi konke kuhlelekile.”
IZimbabwe izaphatha limidlalo ezabe ilamazwe afana leComoros, Mozambique, Eswatini, Zambia, South Africa, Malawi, Angola, Botswana, Mauritius, Madagascar leLesotho.
Amaqembu amazwe la akhangelelwe ukuqalisa ukufika ngoMgqibelo lo.
Imidlalo le izadlalelwa eNorton kunkundla abayibiza bethi yiNgoni Stadium kuthi eminye eHeart Stadium ekaWalter Magaya, oleqembu leYadah elidlala kuCastle Lager Premiership.
Uthe uhambo lwakhe beluhlose njalo ukuthi lugqugquzele abafana.
“Ukuza kwami lapha yikuthi ngizosuthiseka ngizibonele kulokuthi ngizwe ngelikabathi ukuthi isimo sinjani lapha. Sengichwayisisile, hayi abafana balokuthokoza ngabakudlayo labahlala khona, ngakho konke lokhu asikho isizatho sokuthi sehlulwe isizwe. Ngilethemba ukuthi bazenza kuhle njengokweqembu lerugby elanqobayo eUganda,” kutsho umphathintambo wezemidlalo uSanyatwe.
Iqembu le-rugby lanqoba lathola itikiti lokuthi liyedlala kunkezo yomhlaba wonke jikelele ngo2027.
