Online Reporter
YiNtatheli kaMthunywa
UMongameli welizwe uMnangagwa usethembise ukuthi uHulumende wakuleli uzasekela izimuli ezilahlekelwe yizihlobo zazo kubhasi yeDNC Coaches ebe kungozi yomgwaqo eLimpopo, eSouth Africa ngeSonto ebusuku.
Kubikwa inani labantu abafe kungozi le eyenzakale kumgwaqo ka-N1 duzane leMakhado selikhuphuke laya ku-43.
UHulumende ubuye wanxusa izihlobo zalabo abafe engozini yebhasi yeDNC Coaches eLimpopo, eSouth Africa ukuba zisondele zizoncedisa ekuboneni izidumbu zezihlobo zazo.
Esethula amazwi enduduzo uMongameli uMnangagwa uthe uselaye inhlangothi zikaHulumende wakuleli ukuthi zincedise ekulethweni kwezidumbu zezizalwane zakuleli ezife kungozi kukanti zibuye zibhadale lezindleko zezibhedlela zalabo abalimeleyo.
“Ngimele uHulumende weZimbabwe, ngifisa ukwethula amazwi enduduzo emidenini yalabo abalahlekelwe yizihlobo zabo abalapha eZimbabwe kunye labakwamanye amazwe aseSADC,” kutsho uMongameli uMnangagwa.
Abakhokheli elizweni leSouth Africa baveze ukuba ibhasi yeDNC le ibithwele abantu abangu-91 kukanti ibhasi le ikhangelelwe ukuthwala abantu abangu-61 inengi labo abangabe Zimbabwe leMalawi – akade besuka eGqeberha (Port Elizabeth) besiya eHarare.
Kubikwa ibhasi le eyayigijima kakhulu yaphuma emgwaqweni yacina isibhewuka amasondo akhangela phezulu ngeSonto ebusuku.
