Online Reporter
Bhekimpilo Tshalibe
UHWATSHE ingoma etshisayo umhlabeleli kaMaskandi wakoBulawayo, edla amalangabi elesihloko esithi Asiyithuki inhlamba sidlala ingoma.
Ekhuluma lentatheli uPeaceful Ndiweni owaziwa ngokuthi Velabahleke uthe waqalisa ukuhlabela ngo 2019.
“Ngaqalisa ukuhlabela ngo2019. Ngafunda eNsezi Primary ngasengifunda izifundo zaphezulu eNsezi Secondary.
Ngakhulela eSigodini ngasengisiya kwakhela eNkayi,” kutsho uVelabahleke.
Uqhubekele phambili wathi okwamenza wangena kwezomculo yikuthi yena ulesiphiwo sokuhlabelela.
“Okwangenza ngaqalisa ukuba ngumhlabeleli yikuthi ngisasemcane ngangihlabela ku-choir yesikolo njalo ngangikuthanda ukuhlabelela,” kutsho uVelabahleke.
Uthe lokhe waqalisa ukuhlabelela uselengoma ezingu-7.
“Lokhe ngaqalisa ukuhlabela sengahwatsha ingoma ezingu-7 ezilezihloko ezithi Nokulunga eyaphuma ngo2019, lethi Tshayabafana eyaphuma ngo2019, Ulithemba lami eyaphuma ngo 2022, Sitha sami eyaphuma ngo2023, Usukulwami lokubizwa ezulwini layo yaphuma ngo2023, Ngiyamthanda kanye lale engicine ngayo ephume lonyaka ethi Asiyithuki inhlamba sidlala ingoma,” kutsho uVelabahleke.
Uthe ingoma yakhe le ikhuluma ngokujabula.
“Ingoma yami le ikhuluma ngokujabulisa abantu njalo imelana labantu abathanda ukulwa. Ikhuthaza uthando ebantwini lokuthi abantu behlale bejabulile.
“Kukhanya abantu bayayithakazelela kakhulu ingoma le ngoba phakathi kwengoma engazikhiphayo yiyo esithengwe kakhulu,” kutsho uVelabahleke.
Uthe ingoma zakhe abazifunayo zitholakala emakethe.
