admin
YiNtatheli kaMthunywa
UBUTHOLEZWE Ncube, odlala esiswini kuMaZulu FC laseqenjini lesizwe seZimbabwe, ukholwa ukuthi ukuthola imiklomelo efika isithupha emdlalweni emine elandelayo kungabakhulula ukuthi amagama abo abalwe kwabenze kuhle kuPremier Soccer League (PSL) ekupheleni kwesizini.
Usuthu lusalelwe yimidlalo emine ngaphambi kokuvalela ikhefu leKhisimusi. Kumidlalo ezayo, AmaZulu azadlala leMamelodi Sundowns mhlaka 26 kuLwezi, iMaritzburg United ngo 1 kuMpalakazi, Black Leopards (7 Mpalakazi), Bloemfontein Celtic (Mpalakazi 22).
“Khona akukho lukhuni ukuthola imiklomelo le ngoba sizimisele ukwakha amabizo kuleliqembu. Sonke kumele sazi ukuthi kuqala ngami ukuthi iqembu lenze kuhle. Nxa nginyakaza, ngithinta lomunye oseduze kwami ukuthi heyi ndoda! Iqembu liyasidinga. Sesiphumile kodwa ethunzini elimnyama. Ukuphuma phansi kwalelo thunzi-ke kuza lentobeko yokudlala ngenkululeko,” kutsho uNcube.
“Lami ngiyafisa ukuzuza okunengi. Loba ngingeke ngiphumele obala, ngilazo injongo. Ngiyafisa ukubalwa kubadlali abasesiswini abenze kuhle kulisizini. Lapha ngilenhlanhla ngoba ngilabadlali abanjengoNhlanhla Vilakazi, Michael Morton, Ovidy Karuru, Lehlohonolo Majoro, engifunda lukhulu kubo. Lami ngiyafuna ukuzakhela ibizo. Kungabi nje nguButholezwe Ncube ongenzi lutho.”
Insizwa yaKoBulawayo le ibizwe kuqembu lamaWarriors kulolongelwa i-2021 Africa Cup of Nations. Mayelana lokubizwa yisizwe sakubo, ujabule kakhulu.
“Kuhlezi kuyintokozo ukubizwa eqenjini lesizwe laseZimbabwe. Ngiyabonga kumaWarriors lakuMaZulu ngethuba lokudlala ukuze ngibonakale laseqenjini lesizwe. Ngifike lapha ngathola ikhaya kodwa lokho akutsho ukuthi sekumele ngizitshaye isifuba. Kumele ngingakhohlwa ukuthi ngisebenzela ekhaya. Yingakho nje ngiselephupho lokunqoba isicoco leqembu.”
Online Reporter