Online Reporter
Mthabisi Tshuma
UMCULI wakuleli ohlala eSouth Africa owaziwa kakhulu ngokuthi nguJaycee, owathola isicoco se2025 Bulawayo Arts Awards (BAA) ngengoma yakhe ethandwa kakhulu ethi Ungayithi Vuu, uthe isicoco lesi ngesabantu bonke besigaba seNsiza, eMatabeleland South.
Ubikele iphephandaba likazulu ngoLwesithathu ekuseni ukuthi ufuna ukutshengisa ukubonga ngothando lokusekelwa akuthola emphakathini owamkhulisayo.
Umculi lo, ngenxa yodumo lwengoma yakhe, usezibiza ngelokuthi “Mr Ungayithi Vuu”. Uthe ukuthola isicoco seBAA le kwaba yikusebenza gadalala, ukuzinikela lokuzimisela.
“Ukunqoba iBAA yisibusiso esikhulu. Siyathokoza njengesigaba seNsiza. NjengoGodlwayo, isicoco lesi sitsho lukhulu kithi. Ngingatsho ukuthi indlela abantu abayithande ngayo ingoma le iyamangalisa, njalo ngalokho, ngiyabaqakathekisa abantu bakithi. Phambili ngoGodlwayo,” kutsho uJaycee.
UMr “Ungayithi Vuu” uthe lonyaka ulindele ukuvula istudiyo sakhe sokurekhoda eFilabusi njalo uhlela lokuthi enze imicimbi yomculo eminengi eNsiza.
