admin
Ncekwenhle Ncube
UMCULI njalo engumdlali wobulingisi uReward “Judah” Ndlovu (23) usekhuphe idlalade lezokholo elilengoma ezingu-9 aqale ukulipheka ngoNhlangula kuwonalo umnyaka.
UReward ukhiphe imbabazane yedlalade elitsha elithi Ndinenzara.
Ebuzwa nguMthunywa ukuthi uqale nini ukuhlabelela uReward uthe wangena kunkundla yokudumisa iNkosi ngomnyaka ka2010.
Uthe ngalesosikhathi wayetshaya ichachu.
UReward ubike ukuba waqala ukubhala ingoma ngomnyaka ka2013 kodwa wasezilolonga ngenyanga kaNhlangula kuwonalo umnyaka ngenhloso yokuthi akhuphe idlalade elizathandwa ngumphakathi.
Exoxa lentatheli uReward uchaze ukuthi idlalade lakhe elibizwa ngokuthi Ndinenzara, okutsho ukuthi ngilambile, liqukethe ilizwi leNkosi ezimvini zakhe.
Uthe injongo-mqoka yokukhupha idlalade leli yikuthi aphendule labo abasebunyameni beze eNkosini.
“Ngalezinsuku zalamuhla kulula ukukhulumisana labantu ikakhulu abatsha ngengoma, yikho nje ngikhethe ukuthi ngethule ilizwi engilalo ngengoma emphakathini.
“Phakathi kwedlalade lami kulengoma zendimi ezehlukeneyo isiNdebele, isiShona kanye lesiLungu ngoba ngihlose ukuba ngifinyelele abantu abanengi abasendaweni ezehlukeneyo kuleli,” kulandisa uReward.
Umculi lo useke wamukela isicoco ngemva kokukhokhela emncintiswanweni wokuhlabela ebandleli leEagle Life Assembly ngo2013.
Uqhubekele phambili esithi ubonga kakhulu uDokotela Prophet Blessing Chiza ngokumkhuthaza kwaze kwafika isikhathi sokukhupha idlalade lakhe.
Mayelana labaculi abamenze waqhubekela phambili ngokuhlabela uReward uthe abaculi abafana loSifiso Ncwane, Benjamin Dube loTakesure Ncube bamnika intshukuntshu kanye lokuthemba njalo benza azizwe ekhululekile ukusebenzela inkosi.
Idlalade leli likhutshwe ngokusemthethweni ngoLwesithathu ebandleni leEagle Life Assembly.
UReward uke walingisa kumdlalo othi Hades no prevail lapho abengumlingiswa odlala indima enkulu.
Online Reporter