Online Reporter
Nkosilathi Sibanda
UMQEQETSHI weHighlanders uKelvin Kaindu usephumele egcekeni ebika ukuthi isifiso sakhe ngesokuthi athole abadlali abatsha abathathu, ikakhulu abagadli ngoba udinga ababukhali phambi kwegedi.
UKaindu ukhulume lokhu ngesikhathi etshela intatheli ngamalungiselelo akhe okuqinisa iqembu, njengoba isizini yeCastle Lager Premiership ingena kuhlandla lesibili kulimpelaviki.
Ifasitela lokuthengwa lokuthengiswa kwabadlali livulwa mhlaka 1 Ntulikazi, okuyilapho uKaindu athe uhlose ukwengeza ubungcitshi beqembu ngokuthola abadlali abathathu. Umqeqetshi lo uhlaselwe yikugconwa ngabalandeli abakhalaza ngokuthi iqembu lakhe liyaxega njalo kalijabulisi.
“Siqalisa khathesi ukuthi siqinise iqembu njengoba singena kusigaba sesibili seligi. Sizadlala leMWOS, iqembu elasinqoba 1-0 ngehlandla lakuqala. Sithemba ukuthi abadlali bethu abalimeleyo bazabe sebeqinile, ukuze sisondelele amaqembu aphezulu. Ukuba labadlali abatsha kuza lomthwalo omnengi, ikakhulu kwezemali.
“Sifuna umgadli ozaphathisa phambili. Kungaba kuhle ukuthi nxa sitshintsha abadlali, sikhiphe umgadli, singenise umgadli,” kutsho uKaindu ngemva kokulingana nge 0-0 leqembu leChicken Inn ngeSonto eBarbourfields.
Umqeqetshi lo kazange akhululeke ukuqamba abadlali abakhangeleyo ukuthi babengaphansi kwakhe.
Okwakhathesi, ngemva kwemidlalo engu-17, iHighlanders ikunombolo yesitshiya galolunye kungalane yamaqembu. Selinqobe kumidlalo emihlanu, laba ngutshiki lobhanqa kumidlalo eyisitshiya galombili, yanqotshwa kane.
