Online Reporter
Ethel Ncube
KULENDODA yeMuvi eGokwe ebulele umfana oleminyaka engu-13 yokuzalwan ngokumkhama kubangwa ukuthwala isaka lomumbu.
Isikhulumi samapholisa uInspector Emmanuel Mahoko uthe isehlakalo lesi senzakale ngoLwesithathu kundledlana esesiqintini seMuvi, e Gokwe South.
Kubikwa osengumuyi uBrian Warawa wayehamba labanawakhe abane ababethwele amasaka amabili omumbu. Bahlangana lometheswacala, uAnorld Muchenjekwa oleminyaka engu-22 owacela ukuncedisa uBrian ukuthi athwale isaka elilodwa.
Kubikwa ngemva kokuhamba umango emfitshane uMuchenjekwa wama wabeka isaka phansi, uBrian wasecela isaka lakhe.
Umetheswacala ebona lokho wahle wadumela uBrian wamkhama waze wafa. Abanawakhe ababeqhubeke belokhu behamba, babona lokhu kusenzakala kodwa bekhatshana bagijima baya esigayweni ukuyabikela izakhamizi.
Kubikwa izakhamizi zaphanga zahlangana zabopha uMuchenjekwa.
Kwenziwa umbiko emapholiseni abuya azochwayisisa ngendaba le. UMuchenjekwa lokhe esezandleni zamapholisa.
Umzimba kamuyi usesibhedlela seGokwe lapho ozahlolwa khona imbangela yokufa.
