admin
Nkosilathi Sibanda
UMQEQETSHI weHighlanders uMandla Mpofu uyazibuza ukuthi uzalithola ngaphi icebo lokulolonga abagadli bakhe bakwazi ukuhlohla amabhola.
KuHighlanders, lokhe kwasuka uPrince “Mgadafi” Dube, akuzange kube lomdlali osephumele egcekeni ukuthi asivale isikhala esatshiywa yingcitshi le.
Anduba kuvumbuluke uDube, leliqembu belidlala ibhola elihle kodwa lehluleke ukuphetha umdlalo lidabule umambule. Ukusilela kwabadlali abahlohlayo kubahluphile abaqeqetshi ababalisa uErol Akbay, uPeter DeJohng laye uMpofu osebekhona isikhathi eside encedisa abaqeqetshi abedluleyo.
Loba iBosso isiyedlulele phambili kusigaba sama-quarter final enkezo yeChibuku Super, umqeqetshi akumjabulisi ukuthi abafana bakhe bahlohla amabhola amane emidlalweni eyisithupha kulumqhudelwano.
UMpofu, ekhuluma lephephandaba likazulu ngoLwesibili emini, kazange akufihle ukuba ukhathazekile.
Amalungiselelo akhe, uthe azagxila ekubumbeni abadlali ababili kumbe abathathu abangenelisa ukuba lendlala yokuhlohla.
“Eqinisweni akula lutho lokujabulela ngokuya kusigaba esilandelayo,” nguMpofu lo.
“Kumele silungisise okuthile. Umsebenzi uzakubakhona ekulolongeni abadlali ukuthi bakwazi ukukhangela igedi bahlohle. Umdlalo unqotshwa ngokuhlohlwa. Bengifuna ukuthi bahlohle amabhola amanengi.”
IBosso idibana leqembu le-FC Platinum kusigaba sama-quarter finals enkezo yeChibuku.
Iphephandaba likazulu lixhumane labalandeli beqembu ababike ukuba kubalulekile ukuthi umqeqetshi alungisise abagadli bakhe nxa efuna ukubambelela kunkezo.
IHighlanders yiyo intshantshu yeChibuku Super yomnyaka ka-2019.
UNduduzo “Teekay” Ncube ongumlandeli weBosso uthe ingqobe ikumqeqetshi.
“Esiswini senkundla, kuyaziwa ukuba iBosso yilapho eqinela khona, okuveza ukuba kusweleka umqondo kumqeqetshi ukuthi abadlali batshintshe ukwenza. Abadlali bakhona njalo banengi angelisa ukuthi abalolonge babe ngabagadli abahlohlayo,” nguNcube lo, obengakhuthi umdlalo enkundleni yeBarbourfields ngesikhathi ababukeli besavunyelwa.
Omunye wabalandeli, uLeonard Ndebele ohlala leLupane uthumele umbiko kuphephandaba likazulu esithi kazange asuthiseke ngomdlalo weBosso leBulawayo City ngeSonto.
“Ngibukele umdlalo ebulenjini ngisemzini wami. Umdlalo wethu leBulawayo City ubuqhuba kuhle kucaca ukuthi abadlali bayayibamba ibhola, kodwa kwehlula khona olesibindi sokumelana legedi.
Phela akumelanga kulindwe umqeqetshi ukuthi umdlali ahlohle. Ngumlandu wabadlali lowo.”
Online Reporter