Online Reporter
Zimpapers Sports Hub
SEKUHLELWE ukhetho olukhangelwe ngamehlo abomvu olwezikhundla zenhlanganiso yePremier Soccer League (PSL) leyeWomen Premier Soccer League (WPSL) oluzakuba mhlaka 25 Ntulikazi.
Lokhu kuvezwe yinhlanganiso ephethe umdlalo wenguqu kuleli eyeZimbabwe Football Association (Zifa) kuliviki.
Ukhetho lolu lubalulekile ekwakhiweni kakutsha kobukhokheli bebhola lenyawo eZimbabwe. Ku-PSL, izikhundla ezizancintiselwa ngezikamgcinisihlalo, abasekeli bakhe ababili lamalunga ekhomithi amathathu.
Ku-WPSL, kuzabanjwa ukhetho lukamgcinisihlalo, umsekeli wakhe lamalunga ekhomithi amahlanu.
Umongameli weZifa uNqobile Magwizi ugcizelele ukuqakatheka kokhetho lolu ekuvuseleleni umdlalo kuleli.
“Ukhetho lwe-PSL le-WPSL lumele luqakatheke kakhulu ngoba luyingxenye yokuvuselelweni kwengatsha zethu zebhola. NjengeZifa, sizimisele ngokugcweleyo ukuletha uhlelo oluthembekileyo, olusobala, oluqinisa isisekelo somdlalo eZimbabwe,” nguMagwizi lo.
Isikhundla sikamgcinisihlalo wePSL sivuleke ngemva kokusuka kukaFarai Jere ngoMpalakazi nyakenye ngesikhathi encintisa isikhundla sokuba kubhodi yeZifa.
Kusenjalo, inhlanganiso yeWPSL isakhokhelwa ngumgcinisihlalo uTheresa Maguraushe.
Inhlanganiso zebhola likanobhutshuzwayo zilethemba lokuthi ukhetho oluzayo luzaletha inguquko lenkokheli ezikhaliphileyo.
