admin
Cornelius Luphahla
UMHLABELELI wakuleli uSandra Ndebele-Sibindi usethembise abalandeli bakhe ukuthi lonyaka uzabaphekela ividiyo yedlalade lakhe elithi; “Izenzo” eliphume ngomnyaka ophelileyo.
UNdebele-Sibindi uthe uzaphekela abalandeli bakhe amavidiyo engoma ezilitshumi ezikudlalade leli.
UMthunywa uxhumane loSandra Ndebele-Sibindi wachaza ukuthi ividiyo yedlalade lakhe leli ukhangelele ukuthi uzaqala ukuyikhipha kunyanga ezayo.
“Ngikhangelele ukuthi ividiyo yalelidlalade ngizaqala ukuyikhipha ngoMbimbitho ngakho abantu kabahlale bethiye indlebe ngoba bazajabula okwamagama nxa sebebona ividiyo le ezabe iphekwe ngobunono baphezulu,” kutsho uNdebele-Sibindi.
Uqhubekele phambili njalo waveza ukuthi idlalade leli aseliphekela ividiyo walitshaya elabaculi abatshiyeneyo.
“Idlalade leli engiliphekela ividiyo ngalitshaya ngilabaculi abatshiyeneyo. Ingoma ekulelidlalade ethi I-love yeShona leNdebele ngayicula loJah Prayzah, ethi Izenzo ngayicula loJays Marabini, ethi Um’ehamba ngayicula loThandeka Dlala ngabuya njalo ngacula ezinye labanye abaculi.
“Okwenza ngamema abaculi abanengi ekuphekeni idlalade lami leli yikuthi ngangifuna ukukhipha ingoma ezimnandi kakhulu ngijabulise abantu.
“Okunye njalo ngizavakatshela indawo ezehlukeneyo ngizwisa abantu umculo wami ngoba inengi labantu liyakhala lithi kaliwutholi kahle ngoba lihlala endaweni ezikhatshana lalapho engihlala khona. Okwenza ngangasakazi masinya idlalade lami leli yikuthi ngangizithwele ngakho khathesi njengoba sengabeletha ngizabaphakulela uluju lwendlebe lolu,” kutsho uNdebele-Sibindi.
“Ngalokhu-ke ngiyabe ngizama ukubavezela ukuthi ngilesifiso sokuba bonke abantu bawuthole umculo wami ukuze bajabule kungakhathalekile ukuthi bahlala endaweni ezikhatshana,” kutsho uNdebele-Sibindi.
Ngaphandle kokukhipha ividiyo lonyaka uSandra uthembise njalo ukuba kukhulu azakwenza kwezomculo lonyaka noma nje engasathandanga ukukuvezela umphakathi kusasemasinya.
Online Reporter