admin
YiNtatheli kaMthunywa
AMATHIMU ebhola likanobhutshuzwayo aphakathi kwesigaba sokuthenga abadlali kumalungiselelo okuvula isizini yalonyaka. Udaba olusegudwini kwezenguqu ngelokuthengwa lokuthengiswa kwabadlali.
Isizini yeCastle iqala ekupheleni kwenyanga kaMbimbitho.
Kuliviki sidingisise ngokwenzakala emkambo yenguqu, ikakhulu kumathimu angezansi yelizwe.
Sihlolisise ukuthi ngobani okukhanya sebeluqalile uhambo lokulungiselela isizini ka2016 kanye lemqhudelwano yeCaf Confederations Cup le Champions league ezaqala kulimpelaviki.
Chicken Inn
Iqembu leli lihlanganise bonke abadlali ababekhona ngesizini edluleyo. IChicken Inn yiyo intshantshu yeligi yeCastle njalo idlala kumqhugelwano weCaf Champions League ngoMgqibelo.
AmaGamecocks asedlalisa uObadiah Tarumbwa, uTeenage Hadebe loPhysiowell Madhazi loMoses Bemera,
Bonke abadlali bayo baka2015 banikezwe elinye ithuba lokuzitshengisela enkundleni zeAfrica.
Hwange FC
Iqembu lezimbamgodi laziwa njengeqembu elingajwayelanga ukuqhatsha abadlali abaphuma kwamanye amadolobho. Isiko leHwange FC ngelokuphakamisa izizalwane zakulelidolobho. Ngesimo sokuwa kwenkampani yeColliery, kungumthwalo onzima ukuthi iChipangano ithenge abadlali abatsha.
Isikhulumi saleli qembu, umgcinisihlalo wethimu njalo, uJoseph Zulu watsho ngoZibandlela walumnyaka ukuthi kabasoze bazihluphe ngokuthenga abadlali. Njengalokho okwenzakala kuHighlanders, iHwange layo isikhethe abadlali bayo abasakhulayo abadlalela amathimu angaphansi kweHwange Juniors.
Iqiniso elikhulunywa liphephandaba likazulu lamuhlanje yikuthi umqeqetshi weHwange, uNation Dube kayindawo. Besekugcwele amahungahunga athi uDube ulakho ukuhluthunwa yiCaps United kodwa kuvele ukuthi umqeqetshi lo uyasuthiseka eHwange. Ikhona imbiko ezula ngokuthi umqeqetshi lo usefuna ukutshiya emalahleni.
“Lonyaka ngilokhe ngikhuza iHwange. Bengingekho okwenyanga ngoba ngiqeqetsha iqembu lamaWarriors.
Akulathimu engiyikhangeleleyo ngaphandle kweHwange kuPSL,” kutsho uDube, ophinda abengumsekeli kamqeqetshi weqembu lesizwe amaWarriors.
Isivumelwano sikaDube leHwange siphela ngqe ngelanga lokucina kunyanga kaMpalakazi.
Nxa kunjalo kutsho ukuthi amathimu akuligi yePSL kuzamele abophe ziqine uma efuna ukunqoba izimbamgodi.
Highlanders FC
Bathi ziyabheda kuMantengwane. Umgcinisihlalo uPeter Dube ubike ukuthi ithimu ijombile ngakho abasoke bathenge abadlali.
UMthunywa uyakuveza ukuba ngempela iBosso iqina ngamazwi kamgcinisihlalo wayo, nanko isibize abadlali bayo uArnold ‘‘Punkie’’ Ndiweni loRyan Mabhena. Bobabili laba ngabeBosso kodwa ngesizini edluleyo babolekwa kuqembu leBulawayo Chiefs.
Kusukela iBosso yaqala ukulolonga ngoZibandlela, kugijima abadlali ababekhona kuqembu elesizini edluleyo kanye lehlekana lalabo abaphakanyiswe bephuma kumathimu abasakhulayo ama-Under 19.
Kuqula labaqeqetshi, kubikwa umqeqetshi omkhulu uErol Akbay uzafika kuleli ngeviki elizayo.
UDube ubikele abalandeli beqembu ngeSonto ukuthi ababuyele emuva ngokuqhatsha uAkbay njalo lokuthi amaphepha omsebenzi walumqeqetshi aselungisisiwe.
UAkbay uzasekelwa nguAmin Soma Phiri.
Zinengi Ingcitshi zabadlali ezifisa ukungena kwezikamagebhula kodwa zivalelwa phandle ngoba kuthiwa akulamali.
How Mine
Izimbamgodi zegolide lezi sisalele emuva kwamalungiselelo esizini ka2016. Abadlali abanengi ababekhona nyakenye baxotshwa, ikakhulu labo abathengwa ngumqeqetshi uLuke Masomere.
Udaba olusegudwini kulithimu yikuza komqeqetshi omutsha uKelvin Kaindu.
Isikhulumi seHow Mine uPaul MacAndrew ubikele uMthunywa ngoLwesithathu ukuba uKaindu uzaqala umsebenzi wakhe ngeviki ezayo.
“Umqeqetshi usekhona. Okwamanje kusakhulunywa ngendlela ithimu ezabunjwa ngayo lokunye okuphathelane lesivumelwano esikhona phakathi kweqembu lomqeqetshi,” nguMacAndrew lo.
Abadlali osekubikwa balubhekise eHow Mine nguPasca Manhanga, obetshibilikela iTriangle.
Bulawayo City
Le yithimu echinsa ukutshibilika kuligi ephakemeyo kulisizini.
Umqeqetshi wethimu uPhilani Ncube uthi kasoke athenge ngitsho lomdlali oyedwa ngoba uyazi ukuthi abadlali bazazibuyela kuqembu lakhe.
UMthunywa uzwe okunye. Kuqembu lekhansili yakoBulawayo le sekubizwe ezadla ubhedu kudala uMthulisi Maphosa, uThomas Chimenya, uProud Zireni lonozinti uLiberty Chirava.
“Ngiyazi ukuthi abadlali bazazibuyela bodwa kuqembu lami. Asifuni ukukhipha umbiko wokuthi ithimu izathenga kodwa sithi labo abazi ukuthi bayenelisa ukudlala kithi, bazabuya,” ngamazwi kaNcube la.
Utshintsho olungabakhona kuBulawayo City yikudingwa komqeqetshi ozaphatha isikhundla sokubangumqondisi wenhlelo zokulolongwa kweqembu.
Online Reporter