marble nkomo
Fungai Muderere
NGEMVA kokwehlukana leManica Diamonds nyakenye, umdlali wenguqu owake wadla ubhedu uKuda “Nkembe” Mahachi usehlose ukudlalela iHighlanders kulisizini.
UMahachi, odabuka koBulawayo usecabange ukuthi abuyele kuqembu elamenza waba lodumo kusukela esacathula kunobhutshuzwayo. Umdlali lo wake wabayintandokazi esadlala lakuChicken Inn, Mamelodi Sundowns lePirates eNingizimu Afrika.
Abasiki bebunda abasondelele iHighlanders ngoLwesibili babike ukuba kukhanya umqeqetshi omutsha uThabo Senong ekhwabitha ukuba khona kukaMahachi eqenjini loba kusase ludaba olukhulunywa ensitha. USenong, oleminyaka yokuzalwa engu-45, okwamanje useSouth Africa esalinde ukulungiswa kwamaphepha okusebenza kuleli. Uzancediswa nguMkhokheli Dube.
Umaqhuzu weHighlanders uDenzil Mnkandla kazange afihle ukuthi uMahachi usehlelweni lokulolonga labanye abadlali beHighlanders njalo uqale ukulolonga ngoLwesihlanu ngeviki edluleyo. Uthe umdlali lo uziqinisa umzimba labanye njalo ukuba khona kwakhe kuzaya ngabaqeqetshi.
“Liqiniso sibili. UKuda Mahachi ulolonga lathi,” nguMnkandla lo.
Kumalungiselelo ayo esizini entsha, iBosso yehlukane labadlali abanengi ngakho kulindelwe ukuthi idonse abanye.
Abatsha asebephiwe isivumelwano ngunozinti uPride Zendera, Mongameli Tshuma, Tawanda Shenje abavela eHwange, Royn Nyamono osuke kuBikita Minerals loRayton Chuma obedlalela iqembu leNational University of Science and Technology (Nust).
Labo abafulathele iqembu nguMason Mushore, Mckinnon Mushore, Melikhaya Mthabisi Ncube, Honest Mhlanga, Nqobile Ndlovu, Martin Nhubu, Atusaye Nyondo loLearnmore Muyambo.
Kusenjalo, iHighlanders okwakhathesi isaphethwe ngumsekeli kamqeqetshi uDube ngesikhathi kulindwe ukuphenduka kukaSenong.
UDube, owake wadlalela iBosso, kukhangelelwe ukuthi alolonge abafana, abafundise amasiko lemikhuba yeqembu.
Iqembu elizabunjwa kulisizini lilomthwalo wokutshengisa ukuqina kwalo ngesikhathi kuthakazelelwa iminyaka elikhulu lokhe kwasungulwa iBosso.
Online Reporter