Online Reporter
Nkosilathi Sibanda
UMCULI we-AfroSoul, uThembalenkosi, ubika ukuba uzimisele ekusebenziseni umculo wakhe ukukhuthaza abantu ukuthi bathandane.
UThembalenkosi, oyinzalo yakuleli, ohlala eSouth Africa, sekuphele iminyaka ecula njalo useze wethula idlalade elitsha elilengoma ezingu-11, alinike isihloko esithi; The Power of Love.
Kulelidlalade, uThembalenkosi utshengise isiphiwo sokubhala ingoma zothando, okukhangelelwe ukuthi kugqugquzele ezinye izithandani labanye abasadinga omaqondana.
Uthe uhambo lokuhlanganisa idlalade belunzima kodwa uyavuma ukuthi bekumele kubenjalo ukuze aphume lomsebenzi omuhle, oncomekayo.
“Kungithethe iminyaka emibili ngisebenza ngokuzikhandla, ngipheka lelidlalade. Ingoma ezinengi zivela kulokhu engahlangana lakho kwezothando ngaphambilini,” kutsho uThembalami eseGoli.
“Zimbili ingoma ezikhuluma ngendlela uthando lwami kumkami, ingoma ngethi Isithembiso, enye ithi Bambolwami. Lezi zitshengisa indlela indoda ethatha ngayo inyathelo lokwenza isithembiso sokuthi izayigcina inkosikazi yayo. Ngakwenza lokhu, ngalobola, saze satshada ngo2004. Zingoma ezikhuthaza bonke abaqala uhambo lwabo kwezothando. Ngaphezu kwalokho, ingoma ziphinda zinikeze abantu ithemba.”
Kungoma ethi, Buya, umculi lo uveza indaba evamileyo eyokuthi ukudinga umsebenzi kwamanye amazwe kuhlasela njani abantu abathandanayo.
“Ingoma ethi Buya ingenye yengoma ezikhona kulelidlalade. Kulendaba usuka ekhaya esiyadinga umsebenzi, utshiya imuli yakho emuva. Ngihlabela ngokucabanga isithandwa sakho, usitshela ukuthi uyasikhumbula.
“Ngakho-ke idlalade likhuluma ngokuqakatheka kokuba semathandweni lomuntu lakho konke esihlangana lakho emathandweni. Ngibonga bonke engisebenze labo uMuzi (Pikinini), Thandoe, Bongie, Thandani, Eden Praise, Orlando Roland Moyo, Priscilla Nkomo leRamz Entertainment,” kutsho uThembalenkosi.
