Online Reporter
Nkosilathi Sibanda
NGESIKHATHI abanye bejabulela ukuqala komnyaka omutsha, kulendoda ekhethe ukuthi ivuse impi lomphakathi emavinkilini, qede lapho yagwaza uyise.
Isehlakalo lesi senzakale eZhombe, ngaphansi kwenduna uGwesela, esabelweni seMidlands mhlaka 1 Zibandlela.
AbeNational Prosecuting Authority of Zimbabwe lubike ukuba indoda le igwaze uyise ngenxa yokuthi ubemkhuza kulandela ukuhlupha abantu emavinkilini.
“Mhlaka 1 Zibandlela 2026, ngehola lesikhombisa ntambama, umsolwa wayehlupha ngokuhlukumeza abantu ezitolo zeSenkwasi Business Centre.
“Uyise uzame ukumkhuza, kodwa lindoda yakhupha ingqamu yamgwaza kanye esandleni sokunxele. Ogwaziweyo ulimele kakhulu njalo usesibhedlela seKwekwe General,” kutsho iNational Prosecuting Authority of Zimbabwe.
Umsolwa umiswe phambi kukamantshi eKwekwe, wagwetshwa inyanga ezilitshumi esejele. Wehliselwe ezine engaziphatha kuhle, eziyisithupha zitshintshelwe kusijeziso sokusebenzela umphakathi okwamahola angu-210.
“INational Prosecuting Authority of Zimbabwe igcizelela ukuba udlame lungabi khona emphakathini lasezimulini.
“Loba ukujezisa abantu kudlala indima enkulu kulabo abenza udlame, ukuvikela kumqoka njalo kufuna ukubambana, ukuzithiba lokuthola uxazululo olulokuthula,” kutsho iNational Prosecuting Authority of Zimbabwe.
