Online Reporter
YiNtatheli kaMthunywa
KULOMFUNDISI ogwetshwe ukuyapika iminyaka emithathu ejele ngemva kokutholakala elecala lokudlwengula umntwana oleminyaka engu-13 ngesikhathi somthandazo wokwamukela umnyaka omutsha.
Umsolwa oleminyaka engu-27 weRusape, obekumele abe ngumvikeli wabanye emoyeni, usebenzise isikhundla sakhe ukuyenga umntwana lo ukuthi aye endlini yakhe ngemva komkhuleko wokuthakazelela umnyaka omutsha.
Esikhundleni sokuthola isiqondiso somoya, umsolwa ongumfundisi ufike wakhiyela umamangala endlini wasemdlwengula.
I-National Prosecuting Authority of Zimbabwe NPAZ ithe ubufakazi obuvele emthethwandaba buvele buqondiswa yimibuzo ebibuzwa kanye lokwethusela, kungakho ngesizatho sokuba ubufakazi lobu abuphumanga ngokukhululeka umantshi unqume ukuthi ubufakazi abufinyeleli “izinga lokuthola icala lokudlwengula.”
Lanxa kunjalo, umfundisi lo ubuye wazidonsela amanzi ngomsele ngokuthi bahlangana emacansini bevumelene. UMantshi uhle wakhwaza ngokuphazima kwelihlo wathi akulamntwana oleminyaka engaphansi kwengu-18 owenelisa ukwenza isivumelwano sokuya emacansini.
Ngesizatho sokuba umsolwa uvumile isenzo sakhe, inkundla ibuyise isinqumo esifaneleyo sokudlwengula ingane encane.
I-NPAZ ikhiphe isixwayiso esiqinileyo kubakhokheli bomphakathi abangalingeka ukulandela ezinyathelweni zakhe.
“Izikhundla zobukhokheli obungokomoya akumelanga zisetshenziswe ukuhlukuluza abantu abangelamandla. Ukuthoniswa kwecala leli kuveza ukuzimisela kukaHulumende ukuvikela abantwana lokujezisa labo abadala amacala.
