Online Reporter
KUSASA iZimbabwe ithakazelela iminyaka engamatshumi amane lanhlanu yathola uZibuse, ngosuku olufanayo amakholwa lawo azabe ethakazelela usuku olukhulu kukhalenda yabo, olwePhasika lapho uJesu abethelwa khona esiphambanweni.
Umkhosi kaZibuse kumele ujatshulelwe ngumntwana wonke weZimbabwe kungakhathalekile ukuthi ungumhlobo bani, ulombala onjani kumbe ngowaliphi ibandla lezombangazwe. Asifakeni eceleni ukwehlukana kwethu sithakazelele usuku olukhulu kumbali yethu.
Imikhosi le yomibili, ilemitsho emangalisayo kuzizalwane zakuleli kunye lamakholwa esiKhristu.
Zikhona indawo esezibekiwe lapho okuzabe kulembuthano khona, abantu bejabula bendawonye.
Okuhle-ke lonyaka yikuthi isiminengi iminyaka onsundu ezibusa ekhululekile.
Ngalokho-ke siyawabonga amaqhawe alwela inkululeko ngokukhulula ilizwe lakithi. Kibo sithi: “Siyalibonga bantwana benhlabathi, kungayisini asazi ukuthi ngabe singaphi.”
Njengoba nje kuyabe kubuthenwe abantu bejabula sikhuthaza abantu ukuthi bajabule ngendlela eqondileyo, kungabi lomuntu ojabula aze adlulise amalawulo. Ukulwa akungabikhona.
Siyazi sibili ukuthi abantu bayabe bejabulile ngoba ngempela bajabulela ukuzibusa kanye lePhasika nanko amanye amabandla ezokholo azabe ethe gwaqa emabandleni awo ethakazelela umkhosi lo kodwa abantu kumele bakwazi ukujabula babuye bazithibe bangenzi okungekho emthethweni.
Kungaba kuhle njalo ukuthi abantu bahambe ngobunengi babo bayethokoza bendawonye ukuze kukhanye ngempela ukuthi abantwana beZimbabwe babambene, bayimbumba.
Kungaba kubi nxa kungaba labanye abathi thina asithakazeleli uZibuse ngoba singabe linye iqembu ngoba uZibuse ukholiswa ngumuntu wonke kungakhathalekile ukuthi ukuliphi ibandla.
Yebo amaqembu angaze abe manengi kangakanani akutsho ukuthi sesingabantu abatshiyeneyo singabantu banye abakhululwa ngamaqhawe manye ngakho-ke kumele siziqhenye ngalokho.
Kumnandi ukubuthana abantu bexoxa ezendulo bekhumbula lapho abavela khona.
Kumagumbi amane elizwe, amadoda lamanina asedidizela ngoba selize lafika ilanga abakade baqala ukuhlabela ngalo.
Kuhle ukuthi abadala bathathe ithuba bafundise abantwababo ukuthi utshoni uZibuse. Lokhu kuzakwenza bakhule beziqhenya ngelizwe labo ngoba besazi lapho elivela khona lobunzima elahlangana labo.
Akula lizwe elingela mbali yalo, kungakho-ke lelilanga likaZibuse esikhangelane lalo kusasa lijabulisa zonke izizalwane zeZimbabwe.
Banengi abasakhulayo abafela empini kodwa silethemba lokuthi mhlana sijabula siseNembudziya, eGokwe njengamaZimbabwe imimoya yabo izabe ilathi iziqhenya ngeZimbabwe yalamuhla.
Asibakhohlwanga abagulayo abangasoze bafinyelele emikhosini eyabe isezindaweni ezitshiya-tshiyeneyo kusasa.
Sonke siyenelisile iminyaka engu-45 kungakho-ke sithokoza sikhulelwa yimizimba sinjalo, sithokozelela uZibuse loba kulesehlakalo esithe sasehlela.
AMHLOPHE ZIMBABWE.
