marble nkomo
UMKHUBA wokukhanyisa isikhumba (bleaching) usuwandile, futhi usucitshe wamukeleke kwabanengi. Phakathi kwabosaziwayo abaphumela obala ngokukhanyisa umbala, singabala umculi ongasekho emhlabeni, uMshoza, uKhanyi Mbau loTha Simelane.
Nokho-ke abanye kabadingi ukuphumela obala, uzibonela wena umuntu esekhanya okwelanga liphuma. Intatheli ixoxe noDkt Annah Sitshange ongudokotela wesikhumba eGreys Hospital, eMgungundlovu, eSouth Africa othi lumkhuba wokukhanyisa umbala usudlulise amalawulo.
“Umkhuba wokuthi abantu bafune ukukhanya ngombala uyanda kakhulu. Izizathu ezihamba phambili abantu abazibekayo, yikuthi basuke befuna ukususa amabala adalwe yizifo zesikhumba abebelazo phambilini, njengezinduna.
“Linkinga yombala iqala emphakathini lapho omnyama kakhulu ngokombala ezithola egconwa ngalo. Inkolelo yokuthi umuntu okhanyayo muhle, futhi ungcono kulabangakhanyi ngombala, phecelezi i-colourism. Le-social media-ke, ilomthelela omkhulu wokuthi abantu bafune kuchachambe (glow) isikhumba,” etsho.
Uthi ukucwaswa ngombala kuqala emphakathini ngendlela esikhuluma ngayo ngabantu abangakhanyi. Ingane encane ibizwe ngomubiza, ngomnyamana, njalo-njalo. Lento uthi iyayikhuba ingane, ize ikhule layo, bese izeyisa ngokungakhanyi kombala wayo. Uma isikhulile, isilamandla, udokotela uthi yilapho ithola khona izindlela zokuthi izitshintshe ibala.
UDkt Sishange ukhuthaza ukuba kwenqatshelwe lokhu njengomphakathi, kungenziwa. Uthi ngesikhathi umuntu eqala ukusebenzisa izikhanyisi zebala, akabuboni ububi bakho, ubuka ubuhle bokukhanya kwebala. Labantu uma uke wakhanya bayaqala bakuncome, babodwa abathi uphuphuzela uboya, abanye bathi umhlophe, umuhle, noma u-yellow.
“Abantu-ke basebenzisa kakhulu o-cream abayingozi, abangekho emthethweni. Batshiphile, batholakala kalula ezitolo ezincane lasema-salon. Kuqale kuhambe kahle, bese beyakujikela, isikhumba sakho sibe lula sengathi liphepha. Kuvela imithambo, bese lelanga likutshisa lula, kutshe isikhumba uma uselangeni,” utsho njalo.
Ubungozi bokukhanyisa isikhumba:
Ingozi-ke yikuthi ukushintsha kwesikhumba sakho kuchaza ukuthi kawusavikelekile emisebeni yelanga. Umbala lo onsundu esilawo, udalwa yi-melanin, esivikela elangeni ukuze singabi lemvukuzane yesikhumba edalwa yikutshisa kwelanga.
Imvukuzane yesikhumba kwabamnyama:
Imvukuzane yesikhumba ibungajwayelekanga ebantwini abansundu, khathesi sesiyibona kulaba abasebenzisa ama-cream abangekho emthethweni. Abanye basebenzisa ama-drip, oGlutathione.
“Uma ulesifo sesikhumba, sukuma uyethola usizo kubodokotela noma esibhedlela ukuze ungacini usulamabala angasukiyo. Usizo luthole ngokusemthethweni ukuze uthole imithi ephephileyo, ungalaleli yonke into eku-social media ngoba uzatsha,” utsho njalo.
UDkt Sishange unxusa umphakathi ukuba uqaphele amagama owasebenzisayo ngombala wejwabu lomuntu.
“lathi mphakathi masiyeke ukucwasa abantu abangakhanyiyo ngombala ngoba kuyabalimaza lokho, bacine besebenzisa noma yini ukuze bakhanye. Uma ufuna ukusebenzisa ama-drip, yina kudokotela osemthethweni, ozokuchazela kahle yonke into okumele uyazi ngalawo majekiseni.
“Themba udokotela wakho wesikhumba, hayi iTikTok. Ngezikhathi zonke-ke, gcoba isikhumba sakho (moisturise), uzivikele elangeni,” kuphetha uDkt Sishange. —Ilanga
Online Reporter