Online Reporter
Iqoqo: Umdumo wezinkondlo olwalotshwa ngu N.S Sigogo labanye
Inkondlo: Isililo somvundla eyalotshwa ngu R. N Mele
Ophezulu Stinta
Okumunyethweyo
Lapho esiphendula umbuzo esingawubuzwanga othi inkondlo le ikhuluma ngani.
Inkondlo ikhuluma ngobunzima bokuzingelwa kwenyamazana okuthiwa ngumvundla. Inyamazana le ikhihliza isililo ngoba ayibazi ubuthongo, njalo ayiselandawo yokucatsha izingelwa yizothamlilo kanye labantwana bezothamlilo.
Umvundla kukhanya awuhlaselwa yizothamlilo kuphela lasegangeni lapha ngesikhathi umvundla usidla egangeni uhlaselwa layizikhova, lalapho ubalekela emafusini uhlaselwa ngamakhanka.
Umvundla esiwubona ulele emini uyabe ucatshele ukhozi kanye labohelwane inyoni eziwuhlukuluzayo.
Thina siyabe sisithi ulele kanti uphakathi kokwesaba ucatshele impilo yawo, ulala ukhangele emini usenzela ukuthi izakhamuzi zizathi kawulalanga kodwa phinde zivele zigadle nje kungabi ndaba zalutho, kanti vele umvundla lo uzingelelwa kangaka kufunekani, umvundla yinyama emnandi okwamagama isitshebo sabanengi.
Phakathi kwesililo somvundla kuvuka ithemba lokusila emvundleni lapha usucatsha emlindini wesambane sona esigebha umlindi singawulali kulapho ke esesithola khona indawo yokucatsha.
Kubuye kungani izinhlupho azipheli phakathi komlindi lapha umvundla uzithela phakathi kwenyoka layo ilele yazigoqa emlindini wesambane. Uyakhala okwamagama umvundla isililo esibuhlngu kuhele ethunjini ngempela awulandawo yokuhlala ngenxa yokuzingelelwa inyama yawo.
Kambe impilo ingabamnandi ngempela nxa uzingelwa kangaka umvundla lo, yeka usiqhinqe isililo ukuthi wona kawusela kuthula ekuphileni kwawo uhlalela evalweni kukanti vele sudlela egilweni njengenkukhu. Umvundla ukhala ubuye uxolise kuzo zonke izidalwa lezi ezikhathaza umphefumulo wayo.
Ukusetshenziswa kolimi
Imbongi isebenzise ulimi oluhlabusayo olwenza sibe lomfanekiso ocacayo emqondweni wethu siwubone umvundla lo osuhluphekile okwamagama ulala uvuka usethuka, udutshuzwa uzingelwa size sibe lomfanekiso wawo usuphaphatheka ugilana lezixuku kanye lezihlahla usekelwa yizothamlilo, lezinkozi labohelwane.
Imbongi isebenzise umbuzo ongadingi mpendulo lapho ibuza ukuthi
“Ngophephelaphi na mina?
Umbuzo lo awuphenduleki ngendlela umvundla lo osekelwa ngayo lalapho usuthole indawo yokucatsha uyahlaselwa kungakhathalekile ukuthi kusemini kumbe kusebusuku ayikho indawo lapho angacatsha khona.
