Online Reporter
Nkosilathi Sibanda
AKULANTO ejabulisa umoya kaMandla “Lulu” Mpofu ukwedlula ukuphenduka ukuzosebenza ekhaya, kulandela ukwamukela kwakhe ukuthi aqeqetshe iqembu leSimba Bhora.
Umqeqetshi wenguqu lo ubecine ukuqeqetsha kuleli ngesizini ka2022 lapho asuka wathola umsebenzi eBotswana kuSua Flamingoes, Masitaoka FC, Nico United leTafic United.
Utshele iphephandaba likazulu ngoMgqibelo ukuthi wamukele ngezandla zombili umsebenzi omutsha kuSimba Bhora, echaza ukuthi ubekulangazelela ukuphenduka ekhaya.
“Kuhle ukuba sekhaya. Akulanto ejabulisa umoya wami ukwedlula lokhu,” kutsho uMpofu, ophiwe ikontileka leminyaka emibili kuSimba Bhora.
UMpofu wethulwe njengomqeqetshi weSimba Bhora ngoLwesithathu ngeviki edluleyo, lapho azaphatha umsebenzi obubanjwe nguJoel Luphahla oseqhatshwe yiFC Platinum.
Esuka kuleli elubhekise eBotswana, uMpofu wayekuHighlanders. Wake waqeqetsha njalo leChicken Inn.
Engena kuSimba Bhora, uMpofu ulomthwalo wokuqinisa iqembu elihlose ukuba yintshantshu yeligi yeCastle Lager ngomnyaka ozayo.
Kusenjalo, iSimba Bhora ibike ukuba isivumelane lomdlali uCalum English-Brown ukuthi adlalele iqembu leli okwamasizini amabili.
Umdlali lo, uke waba yingxenye yeqembu leWhawha FC.
