Online Reporter
Ophezulu Stinta, Inkondlo: UMagwebu (EJ Ndlovu)
Okumunyethweyo
Imbongi enkondlweni lapha ibabaza intombi emhlophe ayibiza ngokuthi nguMaGwebu. Intombi le sengathi yintombi enhle okwamagama yona imbongi incoma utshwala. Intombi le, utshwala buphekwa ngamabele njalo bugoqozelwa emqgonyeni laphakathi kwamafatshi, lezi ke yizitsha ezinkulu emkulwini ezisetshenziswa ukupheka utshwala.
Utshwala lobu buyamangalisa mpela ngoba buthandwa ngabantu bonke, isizwe jikelele, layo imbongi ize ibabaze lesi simanga sentombi ethandwa lilizwe lonke.
Zinengi imbongi okucaca bezilokhu zibhala ngentombi le emhlophe eziye ziyisola ngokuchitha isizwe, imbongi ithi yona sebebhale baze badela ngentombi le emhlophe eyadiliza imizi yabantu, kwathi labatsha labo sebehambe baphelelwa yinhlonipho ngenxa yayo intombi le emhlophe kutsho abantu abatsha basuka bayithande kakhulu intombi, banatha kakhulu utshwala lobu buze bubaphambanise lomqondo.
Imbongi ithi sokusuke kwabulala isizwe, kambe nxa abatsha labadala besiyagcwala phezu kwentombi le njengamanqe abone inyama kuthiwa luthando bani lolu.
Zikhona ezinathwayo ezinengi kodwa bonke bagijimela intombi. Abanengi sebezithoba ngenhlonipho yabo yonke lapho sebegobela intombi le enguMaGwebu, bayihlonipha okwedlula imizi yabo, abanye kabalandaba lokuthi abantwana ngekhaya badlile na ingqe bona bezitholele uMaGwebu lo kuyalalwa ngendlala.
Kambe nxa sekuze kulalwa ngendlala abanikazi muzi sebekhetha lintombi, ngamandla atheni kodwa ahuga kangaka.
Abantu kabadinwa ngentombi le, mihla yonke bayabe beyilambele, ilanga lingaphuma nje lizitshonele behlezi lentombi le bengadinwanga ngitsho kungela lokukhathala abakuzwayo, kutsho utshwala lobu buyasusa isizungu abantu baze balibale ngenhlupho langakho konke nje okubahlukumezayo ezimpilweni zabo kanye lasemiphefumulweni yabo.
Imbongi iyaveza njalo ukuthi ngayo njalo intombi le abanengi basemajele abanye njalo basezibhedlela okutsho nxa sebethe banatha utshwala lobu basuka benze izinto eziphambene lomthetho bacine sebebotshiwe kodwa nxa bengahlangananga lentombi le kabazitholi sebebephambene lomthetho kanye lobuntu babo.
Imbongi ize ibuze lombuzo ongelampendulo ukuthi pho uMaGwebu lo uzaqedwa yini njengoba elamandla kangaka.
