Online Reporter
Bhekimpilo Tshalibe
INHLANGANISO ebona ngezokulima eye-Agricultural and Rural Development Services (Ardas) isilimukise abalimi ukuba bayenelisa ukulima ama-butternut ngaloleli izulu elikhona bazitshayele imali emangalisayo.
UMnumzana Bhekilizwe Ncube onguDeputy Director esabelweni seMatabeleland South kunhlanganiso ye-Agricultural and Rural Development Services (Ardas) uthe abalimi kabalime ama-butternut ngoba athandwa ngabantu abanengi njalo angenza umlimi abe lenzuzo ephezulu.
“Sikhuthaza abalimi abafisa ukulima ama-butternut ukuthi bathenge inhlanyelo yonhlonzi lwaphezulu ngoba yiyo engandisanga ukuhlaselwa yimikhuhlane eminengi,” kutsho uMnu Ncube.
“Sikhuthaza abalimi ukuthi baqale ngokulungisa umhlabathi babulale amagade njalo benze umhlabathi wabo ulingane,” kutsho uMnu Ncube.
Uthe ama-butternut alomhlabathi avuma kuwo.
“Sikhuthaza abalimi ukuthi belimele ama-butternut emhlabathini ongena kuhle amanzi phansi ngoba akumelanga abe sendaweni etotayo.
Uthe isilimo lesi sifuna ukulinywa endaweni ezikhudumalayo ngoba kasifuni mqando.
“Ama-butternut alinywa kusukela ngenyanga kaNcwabakazi kusiyacina kuMabasa futhi kube yindawo elomumo womkhathi ophakathi kwe-18 kusiya ku-29 degrees Celsius,” kutsho uMnu Ncube.
Uphethe ngokuthi kulemikhuhlane lezibungu ezivame ukuhlasela ama-butternut njalo ukhuthaza abalimi ukuthi befafaze izilimo zabo.
“Ama-butternut avame ukuhlaselwa yimikhuhlane egoqela i-downey meldew, powdery meldew kanye le angular leaf spot ebangelwa yizibungwana ezibalisa ama-thrips, cutworm le redspider.
“Sikhuthaza abalimi ukuthi bafafaze ama-butternut abo besebenzisa i-mancozeb, copper hydroxide kanye le dicofol,” kuphetha uMnu Ncube.
