Online Reporter
Ethel Ncube
INGCITSHI kwezokufuya sezixwayise abalimi abagcina ingulube ngokudla okumele bakuphe ingulube zabo okungaphathisa ukuthi bakhulise izibaya zabo masinyane.
UNkosazana Sandra Ndlovu ongu-Agricultural Extension Officer koBulawayo ukhuthaze abalimi abagcina ingulube ngokudla okumele bakunike ingulube zabo.
Uthe umlimi kumele abekwazi ukuthi ingulube zidla ukudla okulezakhi ziphi zomzimba.
“Ingulube kumele idle ukudla okulesilinganiso sama-protein esiphakathi kwe-12 kusiya ku-22 percent, energy eyi-3,200 kusiya ku- 3,800 kcal/kg, i-fibre eyi 2-5 percent, ama-fats ayi 2-5 percent, calcium eyi 0.8-1,2 percent, i-phosphorus eyi 0,6-1,0 percent, Vitamin A ephakathi kwe- 1 000 kusiya ku-2 000iu/kg kanye lo Vitamin E 20-40iu/kg,” kutsho uNkszn Ndlovu.
Uqhubekele phambili esithi kulemihlobo yokudla kwengulube egoqela ukudla okulama-protein, ama-grain based kanye lokunye okokungezelela.
“Ukudla okumele kuphiwe ingulube okulama-protein kugoqela indumba, inhlanzi kanye lamathambo, ukudla okulezilimo ezibalisa ingqoloyi, amabele, lenyawuthi.
“Okunye ukudla okunganikwa ingulube yimbhida esibolile, izithelo esezibolile kanye lotshwala osobuwonakele,” kutsho uNkszn Ndlovu.
Uthe isilinganiso sokudla okunikwa ingulube kuyatshiyana kusiya ngokuthi ingulube zileminyaka emingaki kanye lesisindo sayo.
“Ukufidwa kwengulube kuyatshiyana kusiya ngokuthi zinganani, ezile zero kusiya kumaviki angu-4 kumele ziphiwe ukudla okuphakathi kwe 0,2kg kusiya 0,4kg ngelanga okulama protein ayi-18-20 percent kanye le energy eyi-3,200 – 3,500kcal/kg.
“Sekuzaba lama grower pigs (4-12 weeks) kumele aphiwe ukudla okuyi 0,5 kusiya ku-1,5kg okulama protein ayi-16-18 percent kanye le energy eyi 3,300-3,600kcal/kg.
“Ama-finisher pigs ngezilamaviki angu-12 kusiyaphezulu ezidinga ukudla okuphakathi kwe 1,5kg kusiya ku-2,5kg okulama protein ayi 14-16 percent le energy eyi 3,200-3,400kcal/kg. Kuthi lezo ezizeleyo kumele ziphiwe ukudla okuyi 2kg kusiya ku-3kg ngelanga,” kuphetha uNkszn Ndlovu.
