Online Reporter
Ethel Ncube
INGCITSHI kwezokulima sezixwayise abalimi abafuna ukugcina imbuzi ngendlela abangazilandela ukuze bethole inzuzo.
UMnumzana Mike Nemashakwe ongu-livestock officer koBulawayo ukhuthaze abalimi abafuna ukugcina imbuzi ngendlela abangazilandela ukuze bethole inzuzo enhle. Uthe ukugcina imbuzi akuhluphi njalo imbuzi zidla amahlamvu ezihlahla zameva.
“Ukutshintsha komumo womkhathi yikho okwenza amadlelo embuzi abe malutshwana njalo imbuzi ziqinile azifani lenkomo. Imbuzi ziyazidlela amahlamvu, njalo amahlamvu adliwa zimbuzi angumuthi yikho ziqinile. Imbuzi azidli kakhulu, zidla ukudla okungaba yi-600 grams,” kutsho uMnu Nemashakwe.
Uqhubekele phambili esithi abalimi kumele bakhele imbuzi izibaya ukuze zihlale zikhudumala.
“Imbuzi ayihlali inyanga ezinengi imithi, kuthatha amalanga angu-150. Sikhuthaza abalimi ukuthi bakhele imbuzi izibaya njalo bakhe bafake ama-poles, bakhe ngezitina njalo bevalele imbuzi zabo ukuze zihlale zikhudumala.
“Okunye okuqakathekileyo yikuthi izibaya zembuzi kumele zihlale zomile ukuze ubumanzi bungafinyeleli imbuzi njalo zingahlali edakeni ngoba imbuzi zifuna lapho okome khona.
“Izibaya zembuzi kumele zibe lophahla ukuze imbuzi zivikeleke nxa sokuyisikhathi sezulu ngoba zinganethwa lizulu ziyabanjwa yimikhuhlane besezisifa,” kuphetha uMnu Nemashakwe.
